सिद्धार्थनगर उपप्रमुखसहित रुपन्देहीका ५ जनप्रतिनिधि एकीकृत समाजवादीमा

बुटवल- सिद्धार्थनगर नगरपालिका भैरहवाकी उपप्रमुख उमा काफ्लेसहित रुपन्देहीका ५ जनप्रतिनिधिले माधव नेपाल नेतृत्वको नेकपा (एकिकृत समाजवदी) मा सनाखत गरेका छन्।

काफ्लेसहित तिलोत्तमा नगरपालिका कार्यपालिका सदस्य यज्ञश्वर क्षेत्री, बुटवल उपमहानगरका वडा सदस्यहरु चीनबहादुर गुरुङ, सुनील शाक्य र गोपाल नेपालले निर्वाचन कार्यालय रुपन्देहीमा पुगेर नेकपा एकीकृत समाजवादीको पक्षमा सनाखत गरेका हुन्। 

रुपन्देहीमा दोस्रो पुस्ताका नेता घनश्याम भुसाल एमालेमै बसेपछि धेरैले रुपन्देहीका स्थानीय तहका जनप्रतिनिधिले नयाँ पार्टी नरोज्ने अनुमान गरिएको थियो। तर, भुसालकै निर्वाचन क्षेत्रबाट प्रतिनिधित्व गर्ने सिद्धार्थनगरका उपप्रमुख काफ्लेले नेकपा एकीकृत समाजवादीमा सनाखत गरेकी हुन्। 

आफू विचारका आधारमा राजनीति गर्ने भन्दै नेकपा एकीकृत समाजवादीमा खुलेको उनले बताइन्। 'अन्य साथी पनि आउनुहुन्छ तर हामीले करकाप गरेनौँ,' उनले भनिन्। 

भोलिसम्म सनाखतको समय भएकाले अन्य जनप्रतिनिधिले पनि सनाखत गर्ने एकीकृत समाजवादी पार्टी रुपन्देहीका संयोजक राजु गुरुङले बताए। 

निर्वाचन आयोगले भदौ २२ गतेसम्म दल रोज्न प्रदेश र स्थानीय तहका जनप्रतिनिधिलाई समय दिएको छ।