‘भिजिट मधेस–२०२० एन्ड बियोन्ड’ अभियान २२ जिल्लामा

काठमाडौं– प्रदेश नम्बर २ का युवाले सुरु गरेको ‘भिजिट मधेस–२०२० एन्ड बियोन्ड’ अभियान तराई–मधेसका २२ जिल्लामा विस्तार भएको छ। अभियानका राष्ट्रिय संयोजक ओमप्रकाश सराफका अनुसार पूर्वको झापादेखि पश्चिम कञ्चनपुरसम्म विभिन्न कार्यक्रम आयोजना गरेर अभियानको प्रवद्र्धन गरिएको छ।

नेपाल आएका विदेशी पर्यटकमध्ये कम्तीमा एक तिहाइलाई मधेस भ्रमण गराउने महत्त्वाकांक्षी लक्ष्य अभियानको छ। सराफ भन्छन्, ‘भिजट मधेस बिना भिजिट नेपाल अपूरो हुन्छ।’

२२ वटै जिल्लालाई जोड्दै पर्यटनमैत्री वातावरण निर्माण गर्ने ‘भिजिट मधेस नेपाल’ अभियान नागरिकस्तरबाट २ वर्षदेखि जारी रहेको आयोजकले जनाएको छ। अभियानका लागि जिल्ला, प्रदेश एवं राष्ट्रियस्तरको टिम स्वयंसेवका रुपमा खटिएको छ। आयोजकका अनुसार अहिलेसम्म १२ वटा देशमा पनि समूह बनाएर युवा यसमा लागेका छन्।

आन्तरिक एवं विदेशी पर्यटकको सुविधाका लागि वेबसाइट र भिजिट मधेस नामक मोबाइल एप पनि विकास गरिएको छ।