स्वदेश फर्किन सामान प्याक गरिसकेका थिए वुहानका नेपाली विद्यार्थीले

काठमाडौं– कोरोना भाइरसको संक्रमण फैलिएको चीनको वुहानमा रहेका नेपालीसँग भिडियो च्याट गर्दा राष्ट्रिय मानव अधिकार आयोगका अध्यक्ष अनुपराज शर्मा आइतबार भावुक भए ।

वुहानमा रहेका नेपालीको उद्धारका लागि गुहार माग्न अभिभावकहरु आयोगमा आएपछि अध्यक्ष शर्माले त्यहाँ रहेका डा. गौरव पोखरेलसँग भिडियो च्याट गरेका थिए। ‘हाम्रो अवस्था कमजोर बन्दैछ सर, हामीलाई उद्धारमा सहयोग गर्नुस् । अन्य देशका नागरिकलाई आफ्नो देशको सरकारले लगिसक्यो । तर हामीलाई हाम्रो सरकारले किन वास्ता नगरेको ?’ पोखरेलले शर्मासँग भने ।

शर्माले चीनमा रहेका नेपालीहरुको बारेमा थप जिज्ञासा राखे। ‘हाम्रो होस्टलमा एक सयजना विद्यार्थी थियौं तर अहिले ६ जना नेपालीबाहेक अरु कोही पनि छैनौं । अहिलेसम्म त हामीलाई कुनै समस्या देखिएको छैन तर यही अवस्थामा यहाँ बस्यौं भने जोखिम बढ्दै जान्छ । हामीलाई होस्टेलबाट बाहिर जान पनि दिइएको छैन । यहाँका नेपालीलाई मानसिक तनाव बढी छ । हामीलाई संक्रमण नहुँदै उद्धार गरियोस्,’ पोखरेलले थपे।

चीनमा रहेका नेपालीहरुको आग्रह र अभिभावकहरुको गुनासोपछि मानव अधिकार आयोगले सरकारलाई ध्यानाकर्षण पनि गराइसकेको छ । आफ्नो परिवारका सदस्यको उद्धारका लागि अभिभावकले धेरै सरकारी निकाय धाइसके ।

कहिले उनीहरु स्वास्थ्य मन्त्रालयमा धर्ना बस्छन् त कहिले परराष्ट्र मन्त्रालय पुग्छन् । यसै क्रममा उनीहरु आइतबार मानव अधिकार आयोग पुगेका हुन् । सम्बन्धित निकायले बेवास्ता गरेको अभिभावकको गुनासो छ ।

अभिभावक रवी भट्टराईले आफ्ना भाञ्जाको अवस्थाबारे मानव अधिकार आयोगमा जानकारी गराए । ‘भाञ्जाले एकै दिनमा १० पटकभन्दा पनि बढी फोन गर्छन् । हामीलाई उद्धार गर्ने विषयमा सरकारले के गरिरहेको छ भन्दै अपडेट माग्छन् तर मैले केही जवाफ दिन सकेको छैन । होस्टेल बाहिर कतै निस्कन दिएको छैन, कोठाभित्रै बन्द भएर बस्नुपरेको छ । राम्रो खाना खान पनि पाएका छैनौं, बाथरुमको पानी उमालेर खानुपरेको छ भन्छन् । मैले यताबाट केही गर्न सकेको छैन,’ रवीले भने ।
गत साता नेपाल सरकारले चीनमा रहेका नेपाली विद्यार्थीलाई उद्धार गर्ने बताएपछि छोराछोरीहरु निकै खुसी भएको अभिभावक दिनेश श्रेष्ठले सुनाए ।

‘छोराछोरीहरुले नेपाल आउन पाउने आशामा आफ्ना सबै सामान प्याक गरिसकेका थिए, तर सरकारले हामीलाई ढाँटिरहेको छ । बरु सरकारले ल्याउन सक्दिन भनोस्, हामी आफैं पहल गर्छौं । विदेशी राष्ट्रसँग विद्यार्थी ल्याइदिने वातावरणको लागि आग्रह गर्छौं । घरखेत बेचेरै पैसा जुटाएर भए पनि हाम्रा छोराछोरी ल्याउँछौं,’ श्रेष्ठले भने।

राधा कायस्थकी छोरी कायस्थ पनि चीनमै अध्ययन गरिरहेकी छिन् । हरेक दिन रुँदै आमालाई फोन गर्दै भन्छिन्, ‘होस्टेलले बन्द गरेर कोठाभित्र राखिदिएको छ । नयाँ वर्षमा स्टोर गरेर राखेको खाना पनि सकियो । बाहिरबाट अरुले ल्याइदिएको खाना पनि गेटमा राखेर जान्छन्, त्यो खाना भित्रसम्म ल्याइदिने मान्छे पनि छैन। हामीलाई बाहिर जान पनि निकै डर देखाइएको छ ।’ ‘हरेक दिन छोराछोरीको चित्कार र आँशु देख्दा हामीलाई कस्तो भएको होला ? सरकारले कहिले देख्ने हाम्रो पीडा?’ कायस्थ प्रश्न गर्छिन् ।

गत शनिबार चीनस्थित नेपाली दूतावासले नेपाल जान चाहनेलाई फर्म भराएको थियो । १८० जना नेपाली विद्यार्थीले फर्म भरे । तर त्यसपछि सरकारले चासो नदिएको अभिभावकको गुनासो छ । ‘छोराछोरीलाई अहिलेसम्म संक्रमण भएको छैन । कोरोना नलाग्दै नेपाल ल्याइदिनुुुस्, उनीहरुलाई बचाउनुस्,’ अभिभावकको सामूहिक माग छ ।

‘झण्डै ३ हप्तादेखि बन्द कोठामा बन्दीको जस्तो जीवन जिउन परिरहेकाले उनीहरुलाई खानबस्न समस्या हुनुका साथै आत्तिएर मानसिक तनाव हुन थालेको छ, तत्कालै फिर्ता ल्याइयोस्,’ अभिभावक भगवतीलाल कक्षपतिले भने।