अख्तियारविरुद्ध तरुण दलको प्रदर्शन

जनकपुरधाम- नेपाली कांग्रेसको युवा संगठन तरुण दलले बालुवाटार जग्गा प्रकरणमा अख्तियारको भूमिकाको विरोध गर्दै जनकपुरमा प्रदर्शन गरेको छ।

बालुवाटार जग्गा प्रकरणमा सरकारको प्रभावमा परी अख्तियारले दोषीलाई उन्मुक्ति दिएको भन्दै प्रदर्शन गरेको हो।

सत्ताको दुरुपयोग गरेर बालुवाटार जग्गा प्रकरणमा सरकारले मुख्य दोषीहरुलाई उन्मक्ति दिँदै राजनीतिक पूर्वाग्रह गरेको र अख्तियार पनि सरकारकै मतियार बनेको तरुण दलको आरोप छ।

जग्गा प्रकरणका मुख्य दोषी मन्त्रिपरिषद्का अध्यक्षसमेत रहेका तत्कालीन प्रधानमन्त्री माधवकुमार नेपाल, नेकपाका महासचिव विष्णु पौडेल, तत्कालीन मुख्यसचिव लिलामणि पौडेलजस्ता व्यक्तिलाई उन्मुक्ति दिएर राजनीतिक प्रतिशोध साध्न नेपाली कांग्रेसका उपसभापति विजयकुमार गच्छदारलाई सरकारले फसाएको तरुण दलले आरोप लगाएको छ।

राजनीतिक पूर्वाग्रहको हिसाबले गच्छदारविरुद्ध लगाइएको मुद्दा फिर्ता हुनुपर्ने, जग्गा प्रकरणका प्रमुख दोषी पूर्वप्रधानमन्त्री नेपालसहितका व्यक्तिहरुलाई कानुनी दायरामा ल्याउनुपर्ने लगायतका माग तरुण दलले गरेको छ।

जनकपुरस्थित गोपाल धर्मशालाबाट निकलेको तरुण दलको विरोध प्रदर्शन जनक चोक, शिव चोक, भानु चोकलगायत नगरको विभिन्न भाग परिक्रमा गरेको थियो।

विरोध प्रदर्शनमा तरुण दल धनुषाका अध्यक्ष संजयलाभ कर्ण, उपसभापति राकेशविक्रम साहलगायतका नेता कार्यकर्ताहरुको सहभागिता रहेको थियो।