ज्ञानेन्द्रको अर्धशतकमा ओमानसामु २५० रनको लक्ष्य प्रस्तुत

काठमाडौं– ‘विश्वकप क्रिकेट लिग–२’को त्रि त्रिकोणात्मक शृंखलाअन्तर्गत नेपालले ओमानसामु २५० रनको लक्ष्य प्रस्तुत गरेको छ।

टस हारेर ब्याटिङ गरेको नेपालले निर्धारित ५० ओभरमा ८ विकेट गुमाएर २४९ रनको योगफल तयार पारे।

नेपाललाई बलियो स्कोरमा पुर्‍याउन कप्तान ज्ञानेन्द्र मल्लले अर्धशतकीय पारी खेले। ७६ बलमा ५६ रन जोडेका उनले आफ्नो पारीमा ६ चौका र १ छक्का प्रहार गरे।

यस्तै, पारस खड्काले ३८, विनोद भण्डारीले ३५, आरिफ शेख तथा कुशल मल्लले समान २८, सुवास खकुरेलले २२ रनको योगदान दिए। करन केसीले १० रन जोड्दा दीपेन्द्र सिंह ऐरी भने ० रनमै पेवेलियन फर्किए।

ओमानका अक्युब इल्यासले सर्वाधिक ४ विकेट लिए। १० ओभर बलिङ गरेका उनले ३६ रन खर्चिए। यस्तै, मोहम्मद नदिमले ३ विकेट चट्काए।

नेपालका एक खेलाडी भने रनआउट भए। ओमानका अन्य पाँच बलरले विकेट लिन सकेनन्।

ओमानले केही बेरमै जवाफी ब्याटिङ गर्नेछ।

शृंखलाअन्तर्गत नेपालले खेलको एक पारीमा अहिलेसम्मकै सर्वाधिक रन जोडेको छ।

यसअघि ओमानले खेलको एक पारीमा सर्वाधिक रन बनाएको थियो। ओमानले अमेरिकाविरुद्धको २१४ रन जोडेको थियो।