सात महिनामा चोरीका २६१ मोटरसाइकल भेटियो, ट्राफिकले बुझायो धनीलाई चाबी

काठमाडौं- उपत्यकाका विभिन्न स्थानबाट चोरी भएका २ सय ६१ वटा मोटरसाइकल फेला पारेर ट्राफिक प्रहरीले सम्बन्धित धनीलाई बुझाएको छ ।

ट्राफिक प्रहरी महाशाखाले चालु आर्थिक वर्षको करिव सात महिनाको अवधिमा ती मोटरसाईकल फेला पारेर धनिलाई बुझाएको हो।

पछिल्लो पटक आइतबार मात्र २५ वटा चोरीका मोटरसाइकल सम्बन्धित धनिलाई हस्तान्त्रण गरेको महाशाका प्रमुख प्रहरी वरिष्ठ उपरीक्षक भीमप्रसाद पौडेलले जानकारी दिए।

यस अवधिमा मोटरसाइकल चोरीमा संलग्न ३० जनाविरुद्ध चोरीको मुद्दा चलाउन पठाएको पौडेलले जानकारी दिए।

पौडेलका अनुसार महाशाखाले चोरीका मोटरसाईकलहरु खोज्न विशेष टोली नै गठन गरेको छ। नितमित चेकजाचका क्रममा, वर्कशपमा हुलिया बदल्न दिएको अवस्थामा ती मोटरसाइकल फेला परेको महाशाखाका प्रवक्ता प्रहरी उपरीक्षक जीवनकुमार श्रेष्ठले जानकारी दिए।

चोरीको मोटरसाइकल फेला परेकोमा खुसी व्यक्त गर्दै कुलेश्वरका शिशिर घिमिरेले ट्राफिक प्रहरीलाई धन्यबाद दिए। उनको पल्सर २२० मोटरसाइकल माघ १० गते इसान हस्पिटल बसुन्धाराबाट चोरी भएको थियो।

यस्तै महाशाखाले पत्रकार सम्मेलन गरि पछिल्लो सात महिनाको प्रगति तथा आगामी कार्ययोजना प्रस्तुत गरेको छ।