नेपालद्वारा अमेरिकासामु १९१ रनको लक्ष्य प्रस्तुत

काठमाडौं– कुशल मल्ल र विनोद भण्डारीको अर्धशतककाे मद्दतमा नेपालले अमेरिकासामु १९१ रनको मध्यम लक्ष्य प्रस्तुत गरेको छ।

‘विश्वकप क्रिकेट लिग २’को त्रिकोणात्मक एकदिवसीय शृंखलाअन्तर्गत कीर्तिपुर क्रिकेट मैदानमा जारी आफ्नो दोस्रो खेलमा नेपाल अलआउट हुँदै गुमाएर १९० रन जोडेको हो।

टस हारेर ब्याटिङको निम्तो पाएको नेपालका लागि विनोद भण्डारीले सर्वाधिक ५९ रन लिए। ६९ बल सामना गरेका उनले आफ्नो पारीमा ६ चौका र १ छक्का प्रहार गरे। कुशल मल्लले ५० रनको योगदान दिए। ५१ बलको सामना गरेका उनले आफ्नो पारीमा ४ चौका र ३ छक्का प्रहार गरे।

यस्तै, कप्तान ज्ञानेन्द्र मल्लले २१, पारस खड्काले १९, करन केसीले १२ र र सुशान भारीले ११ रन बनाए।

अविनाश बोहरा ५ रनमा अविजित रहे।

अमेरिकाका क्यामरोन स्टेभेन्सनले सर्वाधिक ३ विकेट लिए। उनले १० ओभरमा २ मेडन फाल्दै २९ रन खर्चिए। यस्तै, सौरभ नेत्राभाल्करले र रुस्टी थेरोनले २–२ तथा करिमा गोरे, इयान हल्यान्ड र इल्मोरे हुट्चिन्सन समान १ विकेट लिए।

अमेरिकाले केही बेरमा जवाफी ब्याटिङ गर्नेछ।

यसअघि नेपाल शृंखलाको आफ्नो पहिलो खेलमा ओमानसँग १८ रनले पराजित भएको थियो।