लुम्बिनीका स्थानीयलाई बुद्ध कलासँग जोड्न सकिएनः मुख्यमन्त्री पोखरेल

भैरहवा । 

शुक्रबारदेखि लुम्बिनीमा शुरु भएको अन्तर्राष्टिय बौद्ध कला, संस्कृति र साहित्य महोत्सवको लुम्बिनीमा उद्घाटन गर्दै प्रदेश ५ का मुख्यमन्त्री पोखरेलले भने, ‘यहाँका स्थानीय जनताको जीवनस्तर उकास्न हामीले बुद्धिजमको कला, साहित्य र सस्कृतिसँग जोड्न सक्नुपर्छ ।’

मुख्यमन्त्री पोखरेलले बुद्धिजमलाई दुनियाँमा फरक फरक तरिकाले बुझ्ने गरिएको बताउँदै जीवन पद्धतिसँग जोडेर दर्शनको रुपमा अंगिकार गरेमा फलदायी हुने बताए । उनले भने, ‘बुद्धिजमलाई हामीले दर्शनको रुपमा चर्चा गर्याैं । दुनियाँको ठूलो पंक्तिले संस्कृतिको रुपमा ग्रहण गरेको छ ।

केहीले धर्मको रुपमा त केहीले जीवन पद्धतिको रुपमा लिइरहेका छन् । हामीले बुद्धिजमलाई स्थानीयसँग जोडेर लग्यौं भनेमात्रै त्यसले जिवन्तता पाउँछ ।’
मुख्यमन्त्री पोखरेलले लुम्बिनी क्षेत्र र प्राचीन कपिलवस्तु गण राज्य तथा कोलिय गणराज्यको पहिचान र उत्खनन् जरुरी रहेको समेत बताए । सो अवसरमा पूर्वमन्त्री दीपकुमार उपाध्ययले बुद्ध दर्शन सबैको महत्वपूर्ण दर्शन भएको बताउँदै भने, ‘हामी हिरा खानीका मान्छे हातमा कमण्डलु लिएर हिँडिरहेका छौं ।’
महोत्सवमा पूर्व मन्त्री मोदनाथ प्रश्रित, पूर्व सभामुख दमननाथ ढुंगाना, पूर्व राजदूत खगनाथ अधिकारी, टंक कार्की, विश्वविद्यालयका पूर्व उपकुलपति प्रा.डा. त्रिरत्न मानन्धर, पत्रकार डा. कुन्दन अर्याल, पुरातत्वविद् कोषप्रसाद आचार्य, वसन्त विडारी, प्राज्ञ गोपिरमण उपाध्याय सहितका १६ जनाले कार्यपत्र प्रस्तुत गर्ने विश्वविद्यालयका डीन प्रा. डा. वेदप्रसाद गिरीले जानकारी दिए । कार्यपत्र प्रस्तुत २५ र २६ गते हुनेछ भने महोत्सव समापन २६ गते साँझ हुनेछ ।