सार्क सचिवालयमा रुद्राक्ष रोप्दै ओलीले भने– यसले एशियाली सरकारहरुलाई शान्ति प्रदान गर्नेछ

काठमाडौं– प्रधानमन्त्री केपी शर्मा ओलीले काठमाडौंस्थित दक्षिण एशियाली सहयोग संगठन (सार्क)को सचिवालयमा रुद्राक्षको विरुवा रोपेका छन्।
प्रधानमन्त्री भएपछि पहिलो पटक सार्क सचिवालयको भ्रमण गर्दै ओलीले विरुवा लगाएका हुन्।

रुद्राक्ष रोप्दै ओलीले भने,‘मैले यहाँ सचिवालयमा रोपेको रुद्राक्षको बिरुवा दक्षिण एशियाका सरकारहरुलाई शान्ति, विकास, समृद्धि र दक्षिण एशियाका जनताको भलाइ प्रदान गर्नेछ। यसले सार्कलाई सुदृढ पार्न मदत गर्नेछ।’

सार्कले मित्र राष्ट्रहरुसँगै समग्र एशियाको हितमा काम गर्ने ओलीले बताएका छन्। उनले आफूले सार्कको अध्यक्षता हस्तान्त्रणका लागि तयार रहेको पनि बताए । केही दिनभित्रै सार्क सम्मेलन हुने ओलीले दाबी गरे।

शुक्रबार ओलीसँगै परराष्ट्रमन्त्री प्रदीप ज्ञवालीलगायत सार्क सचिवालय पुगेका थिए।