पुलिस र भरतपुरको पहिलो जित

काठमाडौं - पाँचौं आरबीबी-एनभीए राष्ट्रिय महिला-पुरुष क्लब च्याम्पियनसिपमा महिलातर्फको खेलमा सोमबार पुलिस क्लब र भरतपुर विजयी भएका छन्। महिलातर्फको खेलमा नेपाल पुलिस क्लबले पहिलो जित हात पारेको हो।

पुलिसले ढोरपाटन स्पोर्टस् क्लबलाई ३-० को सोझो सेटमा हरायो। ढोरपाटन २५-५, २५-१५ र २५-८ को सेटमा पराजित भयो। जितसँगै पुलिसले ३ अंक प्राप्त गरेको छ। पहिलो खेलमा न्यु डाइमण्डसँग हारको सामना गरेको पुलिस क्लबले सोमबार पहिलो जित निकाल्दै सेमिफाइनलको यात्रा सम्भव बनाएको हो। समूह ‘ए’मा न्यू डाइमण्ड र पुलिसको समान ३/३ अंक छ।

सोमबारै भएको महिलातर्फको दोस्रो खेलमा भरतपुर मेट्रो क्लबले जावलाखेल प्रशिक्षण केन्द्रमाथि जित हात पारेको छ। समूह ‘ए’ को खेलमा भरतपुरले जावलाखेललाई ३-० को सोझो सेटमा हराएको हो।

भरतपुरले जावलाखेललाई २५-८, २५-९, र २५-१५ ले पराजित गर्‍यो। जितसँगै भरतपुरले ३ अंक जोडेको छ। पहिलो खेलमा भरतपुर आर्मीसँग ३-० को सोझो सेटमा पराजित भएको थियो।