मासिक सवा ३ करोडको विद्युत् चोरी

भैरहवा । विद्युत् प्राधिकरण भैरहवा वितरण केन्द्रले विद्युत् वितरण गर्ने क्षेत्रमा अहिले पनि मासिक सवा ३ करोड रुपैयाँबराबरको विद्युत् चोरी हुने गरेको छ । यो चोरी गत वर्षको तुलनामा २ प्रतिशतमात्र कम हो ।

विद्युत् प्राधिकरण भैरहवा वितरण केन्द्रका प्रमुख जितेन्द्र कुमार झाका अनुसार आर्थिक वर्ष ०७५–०७६ मा १२.९ प्रतिशत विद्युत् चुहावट भएकोमा चालू आवमा उक्त दर १०.९ प्रतिशत छ ।

०७६ साउनदेखि मंसिर मसान्तसम्मको तथ्यांक अनुसार एक करोड ८० लाख युनिट विद्युत् चुहावट भएको छ । प्रतिमहिना सवा तीन करोडबराबरको विद्युत् चुहावट हुने गरेको छ । प्राधिकरणका प्रमुख झाले भने, ‘गत साउनमा ७९ लाख युनिट विद्युत् चुहावट भएको थियो । त्यो दर मंसिरमा घटेर १५ लाख युनिटमा पुगेको छ ।’

बाइपास मिटर गरेका ४५ जना र हुकिङ कार्यमा संलग्न ५ जना गरी ५० जनालाई कारबाही गरिएको झाले बताए । भैरहवा लुम्बिनी र धकधई क्षेत्रमा मासिक आयात २ करोड ५६ लाख १२ हजार युनिट रहेको छ भने बिक्री २ करोड ३९ लाख ८९ हजार युनिट रहेको छ । भैरहवा वितरण केन्द्रबाट धकधई, लुम्बिनी र भैरहवा क्षेत्रका ७२ हजार ग्राहकलाई विद्युत् वितरण भइरहेको छ ।