कञ्चनपुरमा स्कुल खोल्न अनुमति

धनगढी– कञ्चनपुरमा पनि विद्यालय सञ्चालन गर्न पाइने भएको छ। कञ्चनपुरका प्रमुख जिल्ला अधिकारी रामप्रसाद पाण्डेले शुक्रबार आदेश जारी गर्दै भदौ १८ गते राति १२ बजेदेखि अर्को व्यवस्था नभएसम्मका लागि भौतिक उपस्थितिमै विद्यालय सञ्चालन गर्न पाउने भनिएको छ। 

आदेशमा भनिएको छ, ‘बालबालिकाका शैक्षिक गतिविधि र अन्य सामाजिक गतिविधिलाई सहज बनाउन यस्तो निर्णय गरिएको हो। सकभर भौतिक उपस्थितिमा पठनपाठन नगरी भर्चुअल माध्यमबाट पठनपाठन गराउनु। यदि भौतिक उपस्थितिमा विद्यालय सञ्चालन गर्नुपर्ने अवस्था आए नेपाल सरकारले जारी गरेको स्मार्ट लकडाउनको भित्र रही सञ्चालन गर्न पाइनेछ,’ सूचनामा भनिएको छ।

कञ्चनपुरमा विद्यालय, पसल निर्वाध रुपमा सञ्चालन गर्न पाइने भए पनि अनावश्यक रुपमा मानिसहरु जम्मा हुने, भिडभाड गर्ने, सभा जुलुस गर्ने, सामूहिक रुपमा पूजाअर्चना गर्ने, जात्रा महोत्सव गर्ने, भोज भतेर गर्ने जस्ता कार्य गर्न नपाइने आदेशमा उल्लेख गरेको छ।