दैलेखमा समाजवादीका अध्यक्षलाई एमालेको जिम्मेवारी

सुर्खेत- एमाले दैलेखले नेकपा एकीकृत समाजवादीका अध्यक्ष बरुननाथ योगीलाई एमालेको जिम्मेवारी दिएको छ। एमाले दैलेखका अध्यक्ष रविन्द्रराज शर्माले योगीलाई पुरानै जिम्मेवारीमा फर्कन आग्रहसहितको पत्र लेखेका छन्। 

केन्द्रीय कमिटी बैठकले एमालेका सम्पूर्ण संरचना जेठ २ गतेको अवस्थामा फर्काएको हुँदा योगीलाई पुरानै जिम्मेवारीमा फर्कन आग्रह गरिएको छ। ‘भदौ १० गतेको केन्द्रीय कमिटी बैठकले मातहतका सबै कमिटीहरू २०७५ जेठ २ गतेकै संरचनामा कायम गर्ने निर्णय गर्‍यो। २०७८ साल भदौ १७ गतेको जिल्ला कमिटी सचिवालय बैठकले केन्द्रको उक्त निर्णय लागू गर्ने जनाएको छ',  एमाले दैलेखका अध्यक्ष शर्माले योगीलाई पठाएको पत्रमा भनिएको छ। 

पत्रमा एमालेले यसअघि गरेको सम्पूर्ण कारबाहीहरू पनि निष्कृय गरिएको उल्लेख छ। उनलाई भदौ २४ गतेभित्र कमिटीको बैठकगरी पार्टीको सदस्यता नविकरणलगायतका काम गरेर जिल्ला कमिटीमा प्रतिवेदन पेश गर्नसमेत भनिएको छ। 

‘कमरेडले मिति २०७८ भदौ २४ गतेभित्र कमिटीको बैठकगरी पार्टीको सदस्यता नविकरणलगायतका अन्य कामलाई सम्पादन गरी जिल्ला कमिटीमा प्रतिवेदन प्रस्तुत गर्नुहुने छ भन्ने विश्वासका साथ यो जिम्मेवारी पत्र पठाइएको छ,’ पत्रमा भनिएको छ।

एमालेको नवौं महाधिवेशनमा दैलेखको उपाध्यक्षमा पराजित योगी तत्कालीन नेकपाको जिल्ला कमिटी सदस्य थिए। एमालेभित्रको विवाद् उत्कर्षमा पुगेकै बेला बैशाख १३ गते उनको नेतृत्वमा एमालेले समानान्तर कमिटी गठन गरेको थियो। माधवकुमार नेपाल एमालेबाट छुट्टिएपछि समानान्तर कमिटी समाजवादीमा विलए भएको थियो।