प्रदेश १ सरकार अल्पमतमा परेपछि विपक्षी गठबन्धन छलफलमा

विराटनगर– प्रदेश १ मा नेकपा एमाले नेतृत्वको सरकार अल्पमतमा परेसँगै विपक्षी गठबन्धनले छलफल सुरु गरेका छन्।  गठबन्धनमा आबद्ध नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी, लोकतान्त्रिक राष्ट्रिय मञ्चको संयुक्त बैठक केही बेरमा बस्दैछ।

नेकपा एमाले छाडेर १० सांसदले नेकपा समाजवादी रोजेपछि एमाले नेता भीमप्रसाद आचार्य नेतृत्वको सरकार अल्पमतमा परेको छ। प्रदेशसभाको बहुमतको लागि ४७ सांसद आवश्यक पर्नेमा १० सांसद समाजवादीमा आबद्ध भएपछि एमालेमा ४१ सांसद रहने भएका छन्। 

९२ सदस्यीय प्रदेशसभामा नेपाली कांग्रेसका २१, नेकपा माओवादी केन्द्रका १५, जनता समाजवादी पार्टीका ३, संयुक्त लोकतान्त्रिक राष्ट्रिय मञ्च र राप्रपाका १–१ सांसद छन्। राप्रपाबाहेक सबै विपक्षी गठबन्धनमा आबद्ध छन् । गठबन्धनको पक्षमा बहुमत पुग्ने देखिएको छ। 

विपक्षी दलले एमाले नेतृत्वको सरकार अल्पमतमा परेकाले आगामी दिनमा चाल्ने कदमको विषयमा छलफल गर्न बैठक बस्न लागिएको माओवादी केन्द्र संसदीय दलका नेता इन्द्रबहादुर आङ्बोले बताए।