प्रदेश १ सरकार अल्पमतमा पर्‍याे, मुख्यमन्त्रीले राजीनामा दिनुपर्छ : राई

विराटनगर– नवगठित नेकपा (एकीकृत समाजवादी) पार्टीका केन्द्रीय सदस्य तथा प्रदेश १ का सांसद राजेन्द्र राईले नेकपा (एमाले) नेतृत्वको प्रदेश सरकार अल्पमतमा परेको बताएका छन्।

एमालेका १० जना प्रदेश सांसदले एकीकृत समाजवादीको पक्षमा सनाखत गरिसकेपछि उनले सरकार अल्पमतमा परेको दाबी गरेका हुन्।

बुधबार प्रदेश १ निर्वाचन कार्यालयमा समाजवादी पार्टीमा सनाखत गरेपछि सञ्चारकर्मीसँग कुराकानी गर्दै सांसद राईले मुख्यमन्त्री भीम आचार्यले नैतिकताका आधारमा पद छाड्नुपर्ने बताए। भने,‘ २२ गतेसम्म दल रोज्ने समय भएकाले भदौ २३ पछि पद छाडे हुन्छ।’ नैतिकताका आधारमा पद नछाडे गठबन्धनको नेतृत्वमा सरकार गठनको प्रक्रिया सुरु गरिने उनले बताए। ‘मुख्यमन्त्री आचार्य प्रतिगामी कित्तामा उभिएकाले उहाँलाई सर्मथन गर्न सकिएन। दल छनोटको आधिकारिकता पाएपछि नयाँ सरकार गठनको प्रक्रिया शुरु हुन्छ,’ उनले भने।

नेता राईले समाजवादी पार्टीमा खुल्ने प्रदेश सांसदको संख्या बढ्न सक्ने बताए। भने, ‘५ जना साथीहरुसँग कुराकानी भइरहेको छ, उहाँहरुले इन्कार गरेको अवस्था छैन।’ 

केन्द्रीय सदस्य राईले एमाले अध्यक्ष केपी शर्मा ओलीले पार्टीबाट निकालेपछि पलायन हुन नसकेर नयाँ दल दर्ता गरिएको बताए। नयाँ पार्टी खोल्नु रहर नभएर बाध्यता भएको उनको तर्क छ। ओलीभन्दा पनि लामो समयदेखि पार्टी निर्माणमा लागेका नेताहरु समाजवादीमा रहेको राईले बताए। 

प्रदेश १ का १० जना प्रदेश सांसदले नेकपा एकीकृत समाजवादी पक्षमा खुलेका छन्। नयाँ पार्टीका सनाखत गर्ने सांसदहरूमा राजेन्द्र राई, उपेन्द्र घिमिरे, कृष्णकुमारी राई, राजन राई, खिनु लङ्वा लिम्बू, सरिता खड्का, सावित्रा रेग्मी, गणेश काम्वाङ, पदमकुमारी गुरूङ र सुनिता चौधरी छन्। 

मोरङको बुढीगंगा ४ का वडाध्यक्ष रमेश खनाल र बुढीगंगा ५ का वडाध्यक्ष कासिम मियाले पनि समाजवादीमा सनाखत गरेको निर्वाचन कार्यालयले जनाएको छ।