भूमि अतिक्रमणबारे प्रधानमन्त्रीले भने– भारतसँग संवाद गर्ने हैसियत राख्छौं

काठमाडौं । प्रधानमन्त्री केपी शर्मा ओलीले केही व्यक्तिहरुले सरकारबाट केही पाउन नसकेकोले सरकारको विरोध गरिरहेको बताएका छन् ।

युवा संघद्वारा काठमाडौंमा आयोजित एक कार्यक्रमलाई करिब १ घण्टा सम्बोधन गरेका प्रधानमन्त्री ओलीले सरकार विरोधीहरुका विषयमा विशेष चर्चा गरे।

प्रधानमन्त्री ओलीले भने, ‘सरकारको विरोध गर्नेहरु दुई प्रकारका छन्। पहिलो, कम्युनिष्ट सरकार भएकाले वैचारिक रुपमै विरोध गर्नेहरु र दोस्रो सरकारबाट लाभ पाउन नसकेकाहरु ।’

विरोधीहरुको स्वरलाई मत्थर पारिने दाबी पनि प्रधानमन्त्री ओलीले गरेका छन्। पार्टीका युवाहरुलाई लोभलालचमा नफस्न सुझाव दिँदै उनले केही युवाहरुलाई मन्त्रिपरिषदमा पनि लगिने बताए।

सीमा विवादका विषयमा प्रधानमन्त्री ओलीले भारतीय सुरक्षाकर्मी फिर्ता हुन सक्ने बताए। नेपालको भूभागमा शताब्दी अघि नै भारतीय सेना बसेको जानकारी दिँदै प्रधानमन्त्री ओलीले भने,‘नेपाली भूमी फिर्ता लिन सक्छौं र लिन सक्नुपर्छ।’

भारतसँग संवाद गर्ने हैसियत आफूहरुको रहेको दाबी गर्दै उनले सरकारले त्यसतर्फ ध्यान दिएको बताए ।

तस्बिरः रासस