एसीसी इमर्जिङ एसिया कप : नेपाल ७ विकेटले पराजित

काठमाडौं - बंगलादेशमा जारी एसीसी इमर्जिङ एसिया कप क्रिकेटको पहिलो खेलमा नेपाल भारतसँग ७ विकेटले पराजित भएको छ। नेपालले दिएको १ सय ९४ रनको लक्ष्य भारतले ४२ ओभरमा ३ विकेट गुमाउँदै पुरा गर्‍यो।

भारतका लागि सानविर सिंहले सर्वाधिक ५६ रन बनाए। यस्तै अर्मान जेफरले अविजित ५१ तथा वेलुर रवि सराथले ४९ रन बनाए। नेपालका करन केसी, ललित नारायण राजवंशी र सुसन भारीले समान एक/एक विकेट लिए।

बलियो भारतको यू-२३ टिमसँग नेपाल ब्याटिङ तथा बलिङ दुबैमा कमजोर देखियो।

त्यसअघि टस हारेर पहिले ब्याटिङ गरेको नेपालले ४४ दशमलव ५ ओभरमा सम्पूर्ण विकेट गुमाउँदै १ सय ९३ रन जोडेको थियो। खराब सुरुवात गरेको नेपालले पहिलो ओभरको दोस्रो बलमै कप्तान ज्ञानेन्द्र मल्ल शुन्य रनमा आउट भएका थिए। त्यसपछि दोस्रो विकेटका लागि शरद भेषवाकर र कुशल भुर्तेलले ५४ रनको साझेदारी गरेका थिए। शरद ४४ तथा कुशल २८ रनमा आउट भए। नेपालका पवन सर्राफले सर्वाधिक ५६ रन बनाए। उनले ७ चौका र २ छक्का प्रहार गरे। यस्तै दिपेन्द्रसिंह ऐरीले २४ तथा करण केसीले २० रन बनाए।

टी–टेन प्रतियोगिता खेल्न यूएई गएका कारण पूर्व कप्तान पारस र सन्दीप भने नेपाली टिममा छैनन्।

प्रतियोगितामा भारत, पाकिस्तान, बंगलादेश, श्रीलंका र अफगानिस्तानसहित नेपाल, ओमान र हङकङ सहभागी छन्। नेपाल रहेको समूह बीमा भारत, बंगलादेश र हङकङ रहेका छन्।