एसीसी इमर्जिङ कप : भारतविरुद्ध ब्याटिङ गर्दै नेपाल

काठमाडौं- बंगलादेशमा ढाकामा जारी एसीसी इमर्जिङ एसिया कप क्रिकेटमा नेपालले भारतविरुद्ध ब्याटिङ गरिरहेको छ।

टस हारेर ब्याटिङको निम्तो पाएको नेपालले १९.१ ओभरमा ३ विकेट गुमाएर ५८ रन जोडेको छ। नेपालले पहिलो विकेटका रूपमा कप्तान ज्ञानेन्द्र मल्ललाई गुमाएको हो। सौरभ दुवेको बलमा उनी खाता नखोली आउट भए। यस्तै, कुशल भुर्तेल २८ र आरिफ शेख २ रन जोडेका छन्।

नेपालका लागि शरद भेषवाकरले २३ रनमा खेलिरहेका छन्। दीपेन्द्रसिंह ऐरीले खाता खोल्न सकेका छैनन्।

भारतका लागि पर्थ रेखाडेले दुई विकेट लिए।

नेपाली टिम ज्ञानेन्द्र मल्लको नेतृत्वमा छ भने भारतीय टिमको नेतृत्व बीआर सरथले गरेका छन्। प्रतियोगितामा भारतले उमेर समूहको टिम मैदान उतारेको हो।

प्रतियोगितामा टेष्ट राष्ट्र भारत, पाकिस्तान, बंगलादेश, श्रीलंका र अफगानिस्तानसहित नेपाल, ओमान र हङकङ सहभागी छन्।

५०-५० ओभरमा खेलाइने प्रतियोगितामा सहभागी आठ टोलीलाई दुई समूहमा विभाजन गरिएको छ। समूह ‘बी’मा रहेको नेपालको समूहमा भारत, बंगलादेश र हङकङ छन्। समूह ‘ए’मा पाकिस्तान, ओमान, श्रीलंका र अफगानिस्तान छन्।

प्रतियोगिताअन्तर्गत नेपालले आगामी शनिबार (नोभेम्बर १६) हङकङसँग र सोमबार (नोभेम्बर १८)मा बंगलादेशसँग खेल्ने छ।

प्रतियोगितामा युएईले नाम फिर्ता लिएपछि नेपालले खेल्ने मौका पाएको हो।