एमएस एकेडेमीलाई क्रिकेट उपाधि

सुर्खेत - सुर्खेतमा भएको मैत्रीपूर्ण क्रिकेटको उपाधि एमएस क्रिकेट एकेडेमीको पोल्टामा परेको छ । मंगलबार सम्पन्न प्रतियोगिताको दोस्रो एवम् अन्तिम खेलमा आयोजक एमएस एकेडेमी ५१ रनले उपाधि हात पारेको हो।

टस जितेर ब्याटिङ गरेको एमएसले निर्धारित २० ओभरमा २ विकेट गुमाउँदै १ सय ९६ रनको विशाल लक्ष्य बनाएको थियो।
एमएसका लागि रवीन्द्रजंग शाहीले ४३ बलमा विस्फोटक ब्याटिङ गर्दै ८९ रन प्रहार गरे।

अर्का ब्याट्सम्यान भविन सारु मगरले ३८ बलमा अर्धशतकीय पारी खेल्दै ५० रन पूरा गरे भने मोहन जिसीले १५ रन थपे। बलिङ गर्ने क्रममा महाभद्रकाली क्रिकेट क्लव दाङका बलर जम्बो मगर र राजेन्द्र शाहीले समान १/१ विकेट लिए भने अन्य बलरले सफलता हात पार्न सकेनन्।

यस्तै लक्ष्य पछ्याउने क्रममा महाभद्रकाली क्रिकेट क्लव १९.३ ओभरमा सम्पूर्ण विकेट गुमाउँदै १ सय ४४ रन मात्र जोड्यो। महाभद्रकालीका ब्याट्सम्यान रिक्की शाहीले विस्फोटक इनिङ खेले लक्ष्यमा पुर्याउन सकेनन्। उनले १३ बलमा सर्वाधिक ४१ रन प्रहार गरे भने दिवान पुन मगरले २७ रन मात्र जोडे। अन्य ब्याट्सम्यानले दोहोरो अंक समेत जोडेनन्।

सस्तैमा समेट्ने क्रममा एमएसका लोकेशजंग हमाल, जनक भण्डारी, प्रज्वल सिंजाली, मोहन जिसी र भरत बुढा सबै बलरले समान २/२ विकेट लिएका थिए। खेलको म्यान अफ द म्याच रवीन्द्रजंग शाही भएका हुन्।