नेपाल एभिसी च्याम्पियनसिपको फाइनलमा

काठमाडौं - बंगलादेशमा जारी एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपको उपाधिका लागि नेपालले प्रतिष्पर्धा गर्ने भएको छ। मंगलबार भएको खेलमा आयोजक बंगलादेशलाई ३-० को सोझो सेटले पराजित गर्दै नेपाल एक खेल अगावै फाइनल प्रवेश गरेको हो।

नेपालले बंगलादेशलाई २५-७, २५-६ र २५-६ को सेटले पराजित गर्‍यो। आजको खेलमा नेपालकी सुनिता खड्का वुमन अफ दि म्याच घोषित भइन्। यस अघि नेपालले पहिलो खेलमा अफगानिस्तान र दोस्रो खेलमा किर्गीस्तानलाई ३-० को सोझो सेटमा पराजित गरेको थियो।

नेपाल यो जितसँगै ३ खेलबाट ९ अंक जोड्दै शीर्ष स्थानमा रहेको छ। नेपालले समूहको अन्तिम खेलमा बुधबार दोस्रो स्थानमा रहेको माल्दिभ्सको सामना गर्ने छ।

प्रतियोगितामा नेपालसहित किर्गिस्तान, माल्दिभ्स, बंगलादेश र अफगानिस्तान गरी पाँच टिम सहभागी छन्।

समूहका शीर्ष दुई टिमले उपाधिका लागि प्रतिस्पर्धा गर्नेछन्।