विराटनगरमा आज खटयात्रा निकालिँदै

विराटनगर- प्रदेश १ को राजधानी विराटनगरमा भव्य रूपमा निकालिँदै आएको राधाकृष्ण रथयात्रा स्थगित गरिएको छ। कृष्णजन्माष्टमीको भोली पल्ट निकालिने गरिएको रथयात्राको ठाउँमा मंगलबार खटयात्रा निकालिँदै छ।

कोरोना महामारीका कारण भक्तजनको भव्य उपस्थितिमा रथयात्रा सम्भव नभएपछि रूप परिवर्तन गरेर खटयात्रा निकाल्न लागिएको राधाकृष्ण मन्दिर व्यवस्थापन समितिका अध्यक्ष बाबुराजा ओझाले बताए। कोरोनाकै कारण गत वर्ष पनि रथयात्रालाई खटयात्रामा परिणत गरिएको थियो।

९०औं संस्करणको रथयात्रा परम्पराको निरन्तरताका लागि मात्रै भए पनि खटयात्रामा सीमित गर्नु परेको ओझाले बताए। खटयात्राले विराटनगर बजार परिक्रमा गर्ने उनले बताए। 

खटलाई गाडीमा राखेर विस्तारै गुडाउने र भक्तजनले सडक किनारबाट दर्शन गर्न पाउने अध्यक्ष ओझाले बताए। विराटनगरको राधाकृष्ण मन्दिरदेखि वि.सं. १९८८ बाट खटयात्रा सुरु गरिएको थियो। वि.सं. २०२४ सालयता भने खटयात्रालाई रथयात्रामा रूपान्तरण गरिएको थियो। रथसँगै पुरानो खटलाई पनि बजार परिक्रमा गराउने गरिन्थ्यो। 

यसैबीच विराटनगरमा राधाकृष्ण रथयात्राका ठाउँमा खटयात्रा निकालिने भए पनि प्रदेश १ सरकारले तीन जिल्लामा सार्वजनिक विदा दिएको छ। सरकारले रथयात्रालाई लक्षित गरेर झापा मोरङ र सुनसरीमा जिल्लामा सार्वजनिक विदा दिएको हो।