डिजेलसहितको ट्यांकर चोरी गर्ने आयल निगमका पूर्वचालक पक्राउ

विराटनगर– डिजेलसहितको ट्यांकर चोरेर भाग्दै गर्दा नेपाल आयल निगम विराटनगरका पूर्वचालक पक्राउ परेका छन् । 

विराटनगर–४ स्थित नेपाल आयल निगमको उत्तरतर्फ रहेको पार्किङ स्थलबाट डिजेलसहितको ना ४ ख ४६९ नम्बरको ट्यांकर चोरी गरेर लग्दै गर्दा विराटनगर ४ का २६ बर्षीय श्रवणकुमार यादवलाई सोमबार बिहान पक्राउ गरिएको मोरङ प्रहरीका प्रवक्ता डिएसपी दीपक श्रेष्ठले बताए । उनका अनुसार चोरी गरेर लग्दै गरेको अवस्थामा मोरङको बूढीगंगा गाउँपालिका–३ बाँसबारीमा पुर्याएपछि ट्यांकरसहित यादव पक्राउ परेका हुन् ।

डिजेल लोड रहेकै अवस्थामा पार्किङ स्थलमा छाडेपछि चालक यामकुमार खनाल सुत्न र सहचालक शिव खनाल शौचालय गएको मौका छोप्दै यादवले चाबी खुला नै रहेको ट्यांकर चोरी गरेको प्रहरीले जनाएको छ । 

यादवसहित चोरीमा चार/पाँच जनाको संलग्नता देखिएको प्रहरीले जनाएको छ । प्रहरीले चोरीमा संलग्न अरुको नाम खुलाएको छैन । उनीहरुलाई पक्राउको तयारी भइरहेको डीएसपी श्रेष्ठले बताए । 

अमलेखगन्ज डिपोमा डिजेल लोड गरिएको ट्यांकर राति १२ः३० बजेतिर विराटनगर आइपुगेको थियो । ट्यांकरमा २० लाख मूल्यभन्दा बढीको २० हजार लिटर डिजेल रहेको प्रहरीले बताएको छ ।