साफ यू–१५ : नेपाल र भुटानबीचको पहिलो हाफ बराबरीमा

काठमाडौं- तेस्रो संस्करणको यू–१५ महिला साफ च्याम्पियनसिप अन्तर्गत लिग चरणको अन्तिम खेलको पहिलो हाफमा घरेलु टोली भुटान र नेपालले बराबरी खेलेका छन्।

भुटानको चाङ्लिमिथाङ रंगशालामा जारी खेलको पहिलो हाफमा दुबै टोलीले गोल रहित बराबरी खेलेका हुन्।

जितविहीन हुँदै प्रतियोगिताबाट बाहिरिसकेका यी दुई टोली पहिलो जितको खोजीमा रहेका छन्। सुरुवाती दुई खेलमा दुबै टोली भारत र बंगलादेशसँग पराजित भएका थिए। लिग चरणमा अंक विहीन रहेका नेपाल र भुटानको यो खेल प्रतिष्ठाको लडाई मात्र रहेको छ। 

यो खेल जित्दै दुबै टोली प्रतियोगिताको सुखद अन्त्य गर्न चाहन्छन्। यदि दुबै टोलीले खेल अवधिभर बराबरी खेले एकएक अंक जोड्दै प्रतियोगितको अन्त्य गर्ने छन्।

नेपालले प्रतियोगिताको पहिलो खेलमा भारतसँग ४–१ गोलको हार व्यहोरेको थियो भने दोस्रो खेलमा बंगलादेशलाई २–१ ले पराजित भएको थियो। भारत र बंगलादेशले प्रतियोगिताको उपाधिका लागि प्रतिस्पर्धा गर्ने तय भैसकेको छ।