साहित्यकार आनन्ददेव भट्टको निधन

काठमाडौं– साहित्यकार आनन्ददेव भट्टको निधन भएको छ। भट्टको ८५ वर्षको उमेर निधन भएको हो। सोमबार बिहान साढे सात बजे आफ्नै निवास काठमाडौंको कालिकास्थानमा भट्टको निधन भएको साहित्यकार मातृका पोखरेलले जानकारी दिए। उनी विगत चार/पाँच वर्षदेखि अल्जाइमर रोगबाट पीडित थिए।

भट्टको पार्थिव शरीरको आजै पशुपति आर्यघाटमा अत्येष्टि गर्ने तयारी रहेको परिवारस्रोतले जनाएको छ। उनका श्रीमती, दुई छोरा र छोरी छन्। 

पूर्वप्रधानमन्त्री एवम् एमाले अध्यक्ष केपी शर्मा ओलीले भट्टको निधनमा दुःख व्यक्त गरेका छन्।

‘देशकै सम्मानित बौद्धिक व्यक्तित्व  प्राध्यापक आनन्ददेव भट्टको निधनको खबरबाट असाध्यै  दुखी छु । नेपाली साहित्यका अविराम साधक वरिष्ट साहित्यकार भट्ट प्रगतिशील लेखक संघका पूर्व अध्यक्ष एवं नेपाल प्रज्ञा प्रतिष्ठानका आजीवन सदस्य हुनुहुन्थ्यो। उहाँले सिंगो देश र विशेषतः बैतडीमा त नेतृत्वमै रहेर हाम्रो पार्टीको आधार निर्माणमा महत्त्वपूर्ण योगदान गर्नुभएको थियो। उहाँको निधन प्रगतिशील क्षेत्रमा ठूलो क्षति हो। म आदरणीय भट्टज्यूप्रति स–सम्मान भावपूर्ण श्रद्धाञ्जलि अर्पण गर्दै शोकसन्तप्त परिवारजनमा गहिरो समवेदना व्यक्त गर्दछु,’ एमाले अध्यक्ष केपी शर्मा ओलीले ट्विटमा लेखेका छन् ।