१३औं साग खेल्ने टेबलटेनिस खेलाडी छनोट

काठमाडौं - घरेलु भुमिमा आयोजना हुने १३औं दक्षिण एसियाली खेलकुद (साग) का लागि टेवलटेनिस खेलाडी छनोट भएका छन्। लैनचौरस्थित टेबल टेनिस प्रशिक्षण केन्द्रमा दुई दिनसम्म चलेको छनोटमा महिला र पुरुषमा समान ५-५ खेलाडी छनोट भएका हुन्। 

पुरुषतर्फ विनेश खनिया, पुरुषोत्तम बज्राचार्य, शिव सुन्दर गोथे र संयोग कपाली छनोट हुँदा महिलामा नविता श्रेष्ठ, रविना महर्जन, दीक्षा तामाङ, एलिना महर्जन र सिक्का सुवाल छनोट भए। 

गत बुधबार सवारी दुर्घटनामा परेका राष्ट्रिय च्याम्पियन स्यान्टु श्रेष्ठलाई अर्को एक मौका दिइने भएको छ। उपचाररत स्यान्टुलाई रिकभरको लागि ४० दिनको समय दिइएको र त्यसपछि छनोटमा पाँचौ स्थानमा रहेका सुनिल महर्जनसँग प्रतिस्पर्धा गराइने संघले जनाएको छ।
 
पुरुषतर्फ विनेशले प्रदीप रोका, मणि लामा, सुनिल महर्जन, पुरुषोत्तम बज्राचार्य, कृष्ण थापामगर, संयोग कपाली र शिव सुन्दर गोथेलाई पराजित गर्दा चन्दन शाहीसँग भने पराजित भएका थिए। पुरुषोत्तम बज्राचार्यले प्रदीप रोका, मणि लामा, सुनिल महर्जन, कृष्ण थापामगर, संयोग कपाली, चन्दन शाही र शिव सुन्दर गोथेलाई पराजित गर्दा विनेशसँग भने पराजित भएका थिए। महिलातर्फ नविताले सोनु थापामगर, रविना महर्जन, एलिना महर्जन, स्वेच्छा नेम्वाङ, दीक्षा दाहाल, दीक्षा तामाङ, सेलिसा खड्गी, गीता भुजेल र सिक्का सुवाललाई पराजित गरिन्।