सिस्टम नै ह्याक गरेर कृषि विकास बैंकबाट ३ करोड चोरी : १० जना पक्राउ

काठमाडौं- कृषि विकास बैंकबाट ब्यालेन्स सिट नै ह्याक गरेर करिब ३ करोड रुपैयाँ बढी चोरी भएको  छ। 

बै‌कको पाँच वटा शाखाबाट सिस्टम ह्याक गरेर पैसा निकालेको पाइएको हो । बै‌कले साढे २ करोड रुपैयाँ ह्याक गरेर चोरी गरिएको पुष्टि गरेको छ भने तीन करोड रकम चोरी भएको हुनसक्ने अनुमान गरेको छ । 

कृषि विकास बैंकको विभिन्न शाखामात्र ट्रान्सफर गरेर केन्द्रीय शाखाबाट सो रकम निकालेको देखिएको प्रहरीले जनाएको छ। तर, कसरी निकालियो भन्ने बारेमा प्रहरीले केही खुलाएको छैन।

बैंकको नाफा नोक्सान खाताबाट सो रकम चोरी भएको आशकां कृषि विकास बै‌कको छ।  राष्ट्र बै‌कले भने २ करोड चोरी भएको आफूलाई जानकारी गराएको जनाएको छ। 

यसअघि चिनियाँ ह्याकरहरुले एटीएम ह्याक गरेर करोडौँ रुपैयाँ निकालेकोमा कृषि विकास बैङ्कको चोरीमा नौलो शैलीमा रकम चोरी भएको पाइएको राष्ट्र बैंकका अधिकारीहरुले बताएका छन् । राष्ट्र बैंकका अनुसार ब्यालेन्स सिटमा नै हिट गरेर पैसा ट्रान्सफर गरिएको देखिएको छ ।

१० जना पक्राउ 

कृषि विकास बैंकबाट ३ करोडभन्दा धेरै रकम निकालेको आशंकामा प्रहरीले १० जनालाई पक्राउ गरेको छ।

काठमाडौँसहित देशका विभिन्न भागबाट प्रहरीले उनीहरुलाई पक्राउ गरेको महानगरीय प्रहरी अपराध महाशाखाले जनाएको छ।

सिस्टम ह्याक गरेर रकम निकाल्ने १० जनामध्ये तीन जनालाई काठमाडौंबाट र अन्यलाई काठमाडौं बाहिरबाट पक्राउ गरिएको हो।

आज दिउँसो २ बजे महाशाखामा पत्रकार सम्मेलन गरी पक्राउ परेकाहरुलाई सार्वजनिक गरिने महाशाखाका एसएसपी सहकुल थापाले जानकारी दिए ।