पाकिस्तानमा ५.८ म्याग्निच्यूडको भूकम्प, दिल्लीसम्म धक्का महशुस

पाकिस्तान प्रशासित कश्मीरको मीरपुरलाई केन्द्र बनाएर ५.८ म्याग्निच्यूडको भूकम्प गएको छ ।

मीरपुर सहरमा राजमार्ग धस्सिएको र त्यहाँ मानवीय क्षति भएको हुनसक्ने वताए पनि अहिलेसम्म हताहतीको विवरण आइ नसकेको पाकिस्तानी पत्रिका डनले उल्लेख गरेको छ । द न्यूजले भने ४ जनाको मृत्यु र ५० जना घाइते भएको विवरण प्राप्त भएको उल्लेख गरेको छ ।

त्यस्तै भारत प्रशासित कश्मीरमा पनि भूकम्पको ठूलो धक्का महशुस गरिएको र त्यहाँ पनि क्षति भएको हुनसक्ने भारतीय सञ्चारमाध्यमहरुले उल्लेख गरेका छन् । 

डनका अनुसार पाकिस्तानका अधिकांश भूभागमा भूकम्पको धक्का महशुस गरिएको छ र मानिसहरु घरबाट निस्केर सडकमा आएका छन् ।

त्यसैगरी भारतको नयाँ दिल्ली, चण्डिगढमा पनि भूकम्पको धक्का महशुस गरिएको बताइएको छ  ।

पाकिस्तानी भूकम्प मापन केन्द्रका अनुसार भूकम्पको केन्द्र मिरपुर नजिक जमिनभन्दा १० किलोमिटर मुनी थियो ।