यू–१८ साफ च्याम्पियनसिप : बंगलादेश सेमिफाइलमा

काठमाडौं– नेपालमा जारी तेस्रो संस्करणको यू–१८ साफ च्याम्पियनसिप अन्तर्गत साविकको उपविजेता बंगलादेश सेमिफाइनल प्रवेश गरेको छ। सोमबार भएको खेलमा बलियो टोली भारतसँग गोलरहित बराबरी खेल्दै बंगलादेश सेमिफाइनल प्रवेश गरेको हो। 

यसअघि समूह ‘बी’ को बंगलादेशले आफ्नो पहिलो खेलमो श्रीलंकालाई ३–० गोलले पराजित गरेको थियो। यस नतिजासँगै बंगलादेशले २ खेलमा ४ अंक जोड्दै समूहको शीर्षस्थानमा स्थान बनाएको छ। भारतले भने प्रतियोगितामा आफ्नो समूहको पहिलो खेल खेलेको छ। भारत १ अंकसहित दोस्रो र श्रीलंका अंकविहिन हुँदै तेस्रो स्थानमा छ। 

अब भारतले यस समूहको अन्तिम खेलमा बुधबार श्रीलंकाको सामना गर्नेछ। भारतलाई समूह विजेता बन्न कम्तिमा ३ गोलको जित आवश्यक छ।

समूह ‘ए’ मा रहेको नेपाल भने प्रतियोगिताको समूह चरणबाटै बाहिरिने प्रवल सम्भावना रहेको छ। पहिलो खेलमा माल्दिभ्ससँग १–१ को बराबरी खेलेको नेपालले आफ्नो दोस्रो खेलमा भने भुटानसँग ३–० को लज्जास्पद हार व्यहोरेको थियो। नेपालको दोस्रो चरणमा स्थान बनाउनका लागि मंगलबार हुने भुटान र माल्दिभ्सबीचको खेलको अंक गणितीय नतिजामा भर पर्नेछ।