पिएसजीको जितमा नेयमारको निर्णायक गोल

काठमाडौं- ब्राजिलियन स्टार नेयमार चम्कदा फ्रान्सेली लिग वानमा पेरिस सेन्ट जर्मेन (पिएसजी)ले लियोनलाई पराजित गरेको छ।

आइतबार राति भएको खेलमा पिएसजीले लियोनलाई १-० ले पराजित गरेको हो। निकै प्रतिस्पर्धात्मक बनेको खेलमा गोलका लागि लामै समय पर्खिनु पर्यो।

पहिलो हाफ बराबरीमा सकिएको खेलको दोस्रो हाफमा पिएसजीले अग्रता लिएको थियो। खेल सकिन मात्र तीन मिनेट बाँकी रहँदा नेयमारले पिएसजीका लागि विजयी गोल गरेका थिए। 

जितसँग पिएसजीले लिगको शीर्ष स्थानमा रहँदै तीन अंकको अग्रता लिएको छ। गत साता स्टार्सवर्गविरुद्वको खेलमा खेलको इन्जुरी समयमा नेयमारले पिएसजीका लागि एक मात्र विजयी गोल गरेका थिए। उनले लगातार दोस्रो खेल खेल्दै खेलको अन्तिम समयमा गोल गरेर पिएसजीलाई जित दिलाए ।

ट्रान्सफर विन्डोजमा बार्सिलोनासँग जोडिएका कारण नेयमारले पिएसजीका सुरुवाती पाँच खेल गुमाएका थिए। तर, उनको ट्रान्सफर सफल हुन सकेन। 

फ्रेन्च लिगको शीर्ष स्थानको पिएसजीले ६ खेलबाट १५ अंक जोडेको छ। लियोन ८ अंक सहित नवौ स्थानमा छ।