सप्तकोसीमा वर्षकै उच्च बहाव, ३५ वटा ढोका खुला [११ तस्बिरमा]

सुनसरी– सप्तकोसीको बहाव आइतबार यस वर्षकै उच्च विन्दुमा पुगेको छ। कोसी ब्यारेज कन्ट्रोल रुमले दिएको जानकारीअनुसार सप्तकोसीमा २ लाख ५७ हजार ७ सय ९० क्युसेकप्रतिसेकेन्ड वहाव पुगेको छ। नदीको बहाव बढेसँगको कोसी ब्यारेजका ३५ वटा ढोका खोलिएका छन्।

साउन ३२ गते कोसीमा यस वर्षकै बढी २ लाख ५६ हजार २० क्यूसेक प्रतिसेकेण्ड वहाव मापन गरिएको थियो। पहिल्लो मापनले सो रेकर्डसमेत उछिनेको छ। पूर्वका अधिकांश भेगमा वर्षा जारी रहेकाले कोसीको जलस्तर अझै बढ्न सक्ने अनुमान छ। चतरामा रहेको बाढी मापन केन्द्रले समेत नदीको जलस्तर बढ्दो क्रममा देखाएको छ। जसका कारणसमेत कोसी ब्यारेजमा गरिने पछिल्ला मापनमा वहाव थप बढ्ने आंकलन गरिएको छ। 

यसैबीच निरन्तरको वर्षासँगै कोसीको वहावमा  उतारचढाव देखिदा श्रीलंका टापु क्षेत्रमा नदीले कटान थालेको छ। नदीमा आएको उतारचढावका कारण यसअघिका सातामै कटान लागेको सो क्षेत्रको कतिपय स्थानमा पुनः कटान सुरु भएको छ।

सुनसरीका प्रमुख जिल्ला अधिकारी उमेशकुमार ढकालले नदीले टापु क्षेत्रका केही स्थानमा कटान गरेको खबर प्राप्त भएको बताए। उनका अनुसार गरैया टापुका २० घर परिवारलाई उद्धार गरी सुरक्षित स्थानमा सार्ने तयारी भइरहेको छ।