लिभरपुलको जितमा मानेको दुई गोल

एजेन्सी- इंग्लिश प्रिमियर लिग फुटबलमा स्ट्राइकर साडियो माने चम्केपछि लिभरपुलले आफ्नो अपराजित यात्रा कायमै राखेको छ।

शनिबार भएको खेलमा न्युकासल युनाइटेडलाई लिभरपुलले ३-१ गोलले पराजित गर्दा मानेले दुई गोल गरे।

घरेलु मैदानमा भएको खेलमा लिभरपुलले पुनरागमन जित निकालेको हो। खेलको सातौँ मिनेटमा घरेलु टोली पछि परेको थियो। न्युकासलका जेट्रो विलिम्सले गोल गरेपछि घरेलु टोली खेलमा पछि परेको थियो। 

तर, २८ औं मिनेटमा मानेले गोल गर्दै लिभरपुललाई खेलमा फर्काए। ४० औं मिनेटमा मानेले व्यक्तिगत दोस्रो गोल गरेपछि लिभरपुल पहिलो हाफमा २-१ ले अघि रह्यो।

त्यसपछि दोश्रो हाफमा थप एक गोल मोहमद सलाहाले गरे। उनले खेलको ७२ औं मिनेटमा गोल गर्दै लिभरपुललाई ३-१ को जित दिलाए। यस जितसँगै लिभरपुलले शीर्ष स्थान कायमै राखेको छ।

लिभरपुलले ५ खेलबाट १५ अंक जोडेको छ। पराजित न्युकासलले समान खेलबाट ४ अंक जोड्दै १६ औं स्थानमा छ।