उपसचिव र सहसचिवका तीन सय पदमा दरखास्त मागिँदै

काठमाडौं- लोक सेवा आयोगले संघका रिक्त दरबन्दीमा नयाँ कर्मचारी भर्ना प्रक्रिया सुरु गर्ने तयारी थालेको छ । 

संघीय तथा सामान्य प्रशासन मन्त्रालयले उपसचिव र सहसचिव पदका लागि माग पठाएपछि आयोगले दुई वर्षपछि संघमा भर्ना प्रक्रिया सुरु गर्ने तयारी थालेको हो । मन्त्रालय स्रोतका अनुसार संघमा करिब तीन सय उपसचिव र सहसचिव पदको दरबन्दी रिक्त छ । 

संघीय मन्त्रालयले गरेको मागलाई आयोगको बैठकमा पठाएको र बैठकले निर्णण गरेपछि नियमित कार्यतालिकाअनुसार असोज तेस्रो साता दरखास्त गरिने आयोगले जनाएको छ ।  

मन्त्रालयले साताभित्रै अन्य पदमा पनि माग पठाउने तयारी भएको जनाएको छ ।

अहिले रिक्त पदको विवरण संकलन भइरहेको र विवरण संकलन भइसकेपछि आयोगमा पदपूर्तिका लागि माग पठाउने मन्त्रालयको भनाइ छ । मन्त्रालयका अनुसार अहिले ५ हजार दरबन्दी रिक्त छ । स्रोतका अनुसार खरिदार, नायब सुब्बा पदका दरबन्दी बढी रिक्त छन् ।