डेंगुका कारण काठमाडौंमा एक जनाको मृत्यु

काठमाडौं - डेंगुको सङ्क्रमणबाट काठमाडौंमा एकजनाको मृत्यु भएको छ। सिन्धुपाल्चोकको इन्द्रावती गाउँपालिका–१२ भिमटारका ६५ वर्षीय रामबहादुर दनुवारको उपचारको क्रममा बिहीबार मृत्यु भएको हो।

ज्वरो आउने, टाउको दुख्ने हुन थालेपछि दनुवारलाई उपचारका लागि धुलिखेल अस्पताल लगिएको थियो। धुलिखेलले डेंगु भएको भन्दै काठमाडौं लैजान सुझाव दिएको थियो। परिवार र आफन्तले राजधानीको बानेश्वरस्थित भेनस अस्पताल पुर्‍याएका थिए। अस्पतालले डेंगु सङ्क्रमणबाट मृत्यु भएको प्रमाणित गरेको छ।

अस्पतालले दनुवारको मृत्यु डेंगुकै कारणले भएको प्रमाणित गरेपछि भिमटारमा गाउँपालिकाले स्वास्थ्यकर्मी परिचालन गरेको छ। गाउँवासीमा डेंगुको थप सङ्क्रमण हुन सक्ने भएकाले त्यसलाई रोकथामका लागि स्वास्थ्यकर्मी परिचालन गरिएको इन्द्रावती गाउँपालिकाका प्रमुख प्रशासकीय अधिकृत विनोद रोकाले जानकारी दिए।