कैलालीमा मानव कङ्काल, शुक्लाफाँटा निकुञ्जमा शव फेला

धनगढी- कैलालीमा मानव कङ्काल फेला परेको छ। जिल्लाको भजनी नगरपालिका–७, चर्रास्थित उखुबारीमा मानव कङ्काल फेला परेको हो।

कान्द्रा नदी किनारमा मुस्लिम समुदायले ताजिया विसर्जन गर्ने स्थानमा रहेको उखुबारीमा कङ्काल फेला परेको जिल्ला प्रहरी कार्यालय कैलालीका प्रहरी नायव उपरीक्षक प्रतीक विष्टले बताए। कङ्कालमा रातो बुट्टेदार सुरुवाल र रातो रंगको आउटर रहेको बताए। उनले घटनाको थप अनुसन्धान भइरहेको बताए। 

उता, कञ्चनपुर जिल्लाको शुक्लाफाँटा नगरपालिका–७ स्थित शुक्लाफाँटा राष्ट्रिय निकुञ्जभित्र पुरुषको शव फेला परेको छ।

जिल्ला प्रहरी कार्यालय कञ्चनपुरका अनुसार उक्त शव शुक्लाफाँटा नगरपालिका–६ का ४० वर्षीय चेतराम रानाको रहेको जनाएको छ।