पारा पावरलिफ्टीङ्ग प्रशिक्षण सुरु

काठमाडौं– पारा महिला पावरलिफ्टीङ्ग प्रशिक्षणसुरु भएको छ । राष्ट्रिय पारा पावरलिफ्टीङ्ग संघको आयोजनामा शुक्रबार देखी प्रशिक्षण सुरु भएको हो । 

नेपालमा पारा महिला पावरलिफ्टीङ्ग खेलाडी उत्पादन गर्ने उद्धेशयले आयोजना गरिएको प्रशिक्षण कार्यक्रममा नेपालका कम्मरदेखि मुनिका भाग कमजोर रहेका करिव २५ पारा खेलाडी र प्रशिक्षकहरुले तीन दिन सम्म सहभागिता जनाउने छन् । 

सहभागि खेलाडी र प्रशिक्षकलाई अन्तराष्ट्रिय टेक्निकल अफिसिसर मलेसियन नुर साहिदा माट शाहले सैद्धान्तिक तथा प्रयोगात्मक प्रशिक्षण दिने छिन् । विभिन्न देशमा विकलाङ्ग रहेका खेलाडीहरुलाई हौसाला प्रदान गर्दै उनीहरुमा आत्मविश्वासको विकास गर्दै पावरलिफ्टीङ्गमा लगाउने उद्धेश्यले कार्यक्रम आयोजना भई रहेको र नेपालमा पनि यस खेलको विकासका लागि आफु आएको शाहले बताइन। 

हाल सय भन्दा बढि राज्यमा विकास भईरहेको पारा पावरलिफ्टीङ्गको विभिन्न १० शारिरीक तौल समूहमा एशियन तथा ओलम्पिकमा प्रतियोगिता हुँदै आईरहेको छ । १९६४ मा जापानमा सुरु भएको प्रतियोगिता सन् २०००मा सिड्नी ओलम्पिकमा महिला पावरलिफ्टीङ्ग प्रतियोगिताको आयोजना गरिएको थियो ।