अभ्यास खेलमा नेपालको सहज जित

काठमाडौं- एसिसी यू-१९ एसिया कप क्रिकेटको तयारीका लागि श्रीलंकाको फस्ट क्लास क्रिकेट क्लब बादुरेलियासँग भएको मैत्रिपूर्ण खेलमा नेपाल विजयी भएको छ । बिहीबार भएको खेलमा नेपाली यू-१९ टोलीले बादुरेलियालाई ८० रनले पराजित गरेको हो । 

वर्षाले प्रभावित भएपछि डीएल पद्दतिको आधारमा छोट्याएर ३१ ओभरमा झारिएको खेलमा १ सय ६५ रनको लक्ष्य पछ्याएको बादुरेलियाले २३.१ ओभरमा सबै विकेट गुमाउँदै मात्र ८४ रन बनाउन सक्यो । 

बादुरेलियाका लागि थेविन्दु दिक्वेलेले सर्वाधिक ३१ रन जोड्दा अरिश्काले २१ रनको योगदान दिए । अन्य ब्याट्सम्यानले भने दोहोरो अंमा रन छुन सकेनन्।  नेपालको जितमा स्पिनर सागर ढकालले ५ विकेट लिए । त्यस्तै कमल सिंह ऐरी र पवन सरार्फले समान २ विकेट लिँदा कुशल मल्लले १ विकेट लिए ।

यसअघि टस जितेर पहिले ब्याटिङ गर्ने निर्णय गरेको नेपालले ४६.४ ओभरमा सबै विकेट गुमाउँदै २ सय ६ रन जोडेको थियो । तर, खेल वर्षाले प्रभावित भएपछि डीएल पद्दतिको आधारमा खेललाई छोट्याएर ३१ ओभरमा झारेर १ सय ६५ रनको लक्ष्य बनाएको थियो । 

नेपालका लागि रित गौतम र हरि चौहानले अर्धशतकीय पारी खेले । रितले १२६ बल खेल्दै ४ चौकाको मद्दतमा ७६ रनको अर्धशतकीय पारी खेले। त्यस्तै हरिले ७८ बलमा २ चौका र १ छक्का प्रहार गर्दै ५६ रनको अर्धशतकीय पारी खेलको हुन् । सन्दीप जोराले २४, आसिफ शेखले १४ र भिम शार्कीले १० रन जोड्न बाहेक अन्य ब्याट्सम्यानको प्रदर्शन सम्झन योग्य रहेन् । 

बादुरेलियाका लागि मलिन्द करुणारत्ने, अभिश्क लक्षण र थिलिना चमाथले समान दुई दुई विकेट लिदाँ मिरागां विक्रामागे र दिल्मिन रत्नयाकेले एक एक विकेट लिए।

यसअघि पहिलो अभ्यास खेलमा नेपाल सिङहलेस क्रिकेट क्लब (एसएससी) को यू-२३ टिमसँग ३ विकेटले पराजित भएको थियो । एसिसी यू-१९ एसिया कप क्रिकेट अन्तर्गत समूह ‘बी’ मा रहेको नेपालले भदौ २० गते श्रीलंकासँग खेल्दै प्रतियोगिताको सुरुवात गर्ने छ ।