क्यानमाथिको निलम्बन फुकुवा हुने संकेत

भैरहवा– अन्तर्राष्ट्रिय क्रिकेट परिषद् (आइसिसी)ले नेपाल क्रिकेट संघ (क्यान)माथि लगाएको निलम्बन फुकुवा हुने संकेत देखिएको छ । 

आइसिसीले स्वतन्त्र समितिमार्फत् अधिवेशन गर्न थालेपछि क्यानमाथि लगाइएको निलम्बन फुकुवा हुने संकेत देखिएको हो । 

आइसिसीले क्यानलाई वैधानिकता दिन स्वतन्त्र समितिमार्फत् प्रदेश अधिवेशन गराइरहेको जानकार बताउँछन् । 

क्यानमाथिको निलम्बन फुकुवा हुने संकेतले क्रिकेट खेलाडी, प्रशिक्षक र क्यान नेपालका पूर्वपदाधिकारीमा खुसी छाएको छ । 

आइसिसीले २०७३ वैशाख १३ गते क्यानमाथि निलम्बन गरेको थियो । त्यसयता नेपाली क्रिकेट क्षेत्रमा उल्लेखनीय गतिविधि हुन सकेका छैनन् । 

धमाधम प्रदेश अधिवेशन 

आइसिसीको स्वतन्त्र समितिले धमाधम क्यानको प्रदेश समितिको अधिवेशन थालेको छ । अहिलेसम्म सुदूरपश्चिम, गण्डकी, प्रदेश १ तथा प्रदेश ५ र ६ को अधिवेशन सम्पन्न गरिसकेको क्यानले जनाएको छ । 

अधिवेशनले सुदूरपश्चिममा हरि रेग्मी, गण्डकीमा देबेन प्रजु, प्रदेश १ मा ढुण्डी लामा तथा प्रदेश ५ र ६ मा दुर्गबहादुर थापामगरलाई अध्यक्षमा चयन भएका छन् । 

यस्तै, प्रदेश २ मा भदौ १४ गते र प्रदेश ३ मा भदौ २१ गते अधिवेशन गर्ने तयारी थालिएको बताइएको छ । 

प्रदेश ५ र कर्णाली प्रदेशको संयुक्त अधिवेशन 

प्रदेश ५ र कर्णाली प्रदेशको संयुक्त अधिवेशन शनिबार भैरहवामा सम्पन्न भएको छ ।

कर्णाली प्रदेशअन्तर्गत सुर्खेत जिल्लामा मात्रै क्यानको समिति भएकाले प्रदेश ५ र कर्णाली प्रदेशको संयुक्त अधिवेशन गरिएको हो । 

अधिवेशनले उपाध्यक्षमा नवलपरासीका कृष्णप्रसाद श्रेष्ठ, सचिवमा रूपन्देहीका सञ्जय गुरुङ, कोषाध्यक्षमा पाल्पाका राजेश श्रेष्ठ चयन भएका छन् । यसैगरी, सदस्यहरूमा कपिलवस्तुका माया ज्ञवाली, दाङका कैलाश रोका मगर, बर्दियाका विनयराज भण्डारी, सुर्खेतका श्रीधर के.सी., बर्दियाका कृृष्णप्रसाद बस्याल, रूपन्देहीका विनय ज्ञवाली, कपिलवस्तुका पदमराज श्रेष्ठ, दाङका किशोरचन्द्र गौतम र बाँकेका सञ्जयराज सिंह सदस्य चयन भएको आइसिसीद्वारा गठित स्वतन्त्र समितिका कानुनी सल्लाहकारसमेत रहेका निर्वाचन अधिकृत राजेश्वर श्रेष्ठले जानकारी दिए । 

आइसिसीले गठन गरेको स्वतन्त्र समितिमा लेखबहादुर क्षेत्री, ठाकुरप्रसाद थापा, आइसिसीका अमर शेष, विपिन कोठारी र अलि अकबर खान तथा कानुनी सल्लाहकारमा राजेश्वर श्रेष्ठ रहेका छन् ।

अधिवेशनमा प्रदेश ५ का सामाजिक विकासमन्त्री सुदर्शन बराल, प्रदेश सांसद् सन्तोष पाण्डे, सिद्धार्थनगरका प्रमुख हरिप्रसाद अधिकारी, राखेपका बोर्ड सदस्य विनोद मैनालीले आइसिसीले केही महिनामै क्यानमाथिको प्रतिबन्ध फुकुवा गर्नेमा आशावादी रहेको बताए । 

यसरी लगाइएको थियो क्यानमाथि निलम्बन 

२०७२ मंसिर २८ र २९ गते क्यानका तत्कालीन उपाध्यक्ष चतुरबहादुर चन्द र महासचिव अशोकनाथ प्याकुरेल पक्षले अधिवेशन सम्पन्न गर्यो ।

अधिवेशनले चन्दको नेतृत्वमा नयाँ कार्यसमिति चयन गरेको थियो । तर, त्यसको केही समयपछि उक्त समिति वैधानिक नभएको भन्दै उजुरी पर्यो । राखेपले पनि उजुरीको आधारमा चन्द नेतृत्वलाई वैधानिकता दिएन ।

त्यसपछि राखेपले रमेश सिलवालको नेतृत्वमा अलग्गै तदर्थ समिति नै गठन गर्यो । सिलवाल अहिले राष्ट्रिय खेलकुद परिषद्को सदस्यसचिव छन् । 

माघमा गठन गरेको क्यानको तदर्थ समिति र चन्द पक्षबीचको विवाद बढेपछि आइसिसीले २०७३ वैशाखमा क्यानलाई निलम्बन गरेको थियो ।

पदाधिकारीबीचको पदीय बाँडफाँड नमिल्दा निलम्बनसम्म पुगेको क्यान अहिलेसम्म पनि निष्क्रिय नै छ । यसको प्रत्यक्ष मार सिंगो नेपाली क्रिकेटलाई क्षेत्रलाई परेको छ । 

क्यान निलम्बनमा पर्दा अन्तर्राष्ट्रिय स्तरका तालिम र प्रतियोगितामा समेत नेपाली क्रिकेट खेलाडीले भाग लिने राम्रो वातावरण भएको छैन । 

०७४ सालमा आइसिसीका उपाध्यक्ष इमरान ख्वाजा र वित्तीय शाखाका अमर शेख काठमाडौं आएर विवाद मिलाउने प्रयास गरे पनि सफल भएनन् । त्यसपछि आइसिसीले क्यानलाई चासो दिन छाडेको थियो । 

आइसिसीले एसोसिएट राष्ट्रको नियम २.९ अनुरूप क्यानलाई निलम्बन गरेको थियो ।