एभिसी सेन्ट्रल जोन भलिबलमा कीर्गिस्तान च्याम्पियन

काठमाडौं- एभिसी सेन्ट्रल जोन सिनियर पुरुष भलिबल च्याम्पियनसिपको उपाधि कीर्गिस्तानले जितेको छ । 

शनिबार लगनखेलस्थित नेपाली सेनाको शारीरिक तालिम तथा प्रशिक्षण केन्द्रको कभर्डहलमा भएको खेलमा उज्वेकिस्तानलाई पराजित गर्दै कीर्गिस्तान प्रतियोगिताको च्याम्पियन बनेको हो ।

कीर्गिस्तानले उज्वेकिस्तानलाई ३-० को सोझो सेटमा पराजित गरेको हो । पहिलो सेटमा २६-२४ ले विजयी भएको कीर्गिस्तान दोस्रो सेटमा २७-२५ र तेस्रो सेटमा २५-१९ ले विजयी भएको हो । 

सेमिफाइनलमा कीर्गिस्तानले तुर्कमेनिस्तानलाई पराजित गर्दै फाइनमा स्थान बनाएको थियो। त्यस्तै उज्वेकिस्तानले माल्दिभ्सलाई पराजित गरेको थियो । एसियन भलिबल संघको संयोजनमा नेपाल भलिबल संघले नेपालमा पहिलो पटक आयोजना गरेको एभिसी सेन्ट्रल जोन सिनियर पुरुष भलिबल च्याम्पियनसिपको ७ राष्ट्रको सहभागिता रहेको थियो ।