एभिसी सेन्ट्रल जोन भलिबलमा नेपाल पाँचौ

काठमाडौं- एभिसी एसियन सेन्ट्रल जोन भलिबल च्याम्पियनसिपमा नेपाल पाँचौ भएको छ । लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा शुत्रबार भएको खेलमा अफगानिस्तानलाई ३-१ को सेटमा पराजित गर्दै नेपाल पाँचौ भएको हो । 

पहिलो सेटमा २५-२३ ले विजयी भएको नेपाल दोस्रो सेटमा २३-२५ ले पराजित भएको थियो । त्यस्तै तेस्रो सेटमा २५-१८ को फराकिलो अन्तरले विजयी हुँदा चाथौ सेटमा २६-२४ ले जित हात पारेको थियो । पराजित अफगानिस्तानले छैठौं स्थान हात पारेको छ । 

समूह ‘ए’मा रहेको नेपालले समूह चरणका दुबै खेल गुमाउँदै समूहको तेस्रो भएको थियो । यता समूह ‘बी’मा रहेको अफगानिस्तानले समूहको एक खेल मात्र जित्नै समूह चरणमा तेस्रो बनपछि प्रतियोगितामा पाँचौ स्थानका लागि प्रतिस्पर्धा भएको थियो । 

प्रतियोगिताको फाइनल खेल भोली  (शनिबार) उज्वेकिस्तान र किर्गीस्तानबीच हुनेछ ।