आज पाँचौ वरियताका लागि नेपाल र अफगानिस्तान भिड्ने

काठमाडौं- एभिसी एसियन सेन्ट्रल जोन भलिबल च्याम्पियनसिपको पाँचौं वरियताका लागि घरेलु टोली नेपाल र अफगानिस्तानले प्रतिस्पर्धा गर्ने भएका छन् । खेल लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा दिउँसो ३ बजे सुरु हुने छ । 

समूह चरणबाट बाहिरिएका दुबै टोलीले पाँचौ र छैटौं स्थानको खेलका लागि प्रतिस्पर्धा गर्ने छन् । नेपालले समूह ‘ए’मा रहदै समूहमा दुबै खेल गुमाएको थियो । त्यस्तै समूह ‘बी’मा रहेको अफगानिस्तान उक्त समूहको तेस्रो स्थानमा रहेका कारण पाँचौं वरियताका लागि प्रतिस्पर्धा गर्ने मौका पाएको हो ।

अफगानिस्तानले समूह चरणमा बंगलादेशलाई पराजित गर्दै समूहको तेस्रो स्थानमा रहेको थियो । तीन टोली रहेको समूह ‘ए’मा दुवै खेल हारेपनि स्वतः तेस्रोमा रहेको नेपालले पाँचौ वरियताका लागि खेल्ने मौका पाएको हो । 

नेपाल र अफगानिस्तानबीच एक सातामा तेस्रो पटक खेल प्रतिस्पधौ हुँदै छ । अघि च्याम्पियनसिपको तयारीका लागि यि दुई टोलीबीच बुधबार र बिहीबार दुई मैत्रीपूर्ण खेल भएका थिए । दुवै खेलमा नेपालले अफगानिस्तानलाई ३-२ ले हराएको थियो । 

यस खेलमा पनि नेपाल अफगानिस्तानलाई पराजति गर्दै प्रतियोगितामा सुखद अन्त्य गर्न चाहन्छ । यता अफगानिस्तान भने दुई मैत्रिपूर्ण खेलमा व्यहोरेको हारको बदला लिन चाहन्छ ।