धूमधामका साथ बकर इद मनाइँदै

काठमाडौं- इस्लाम धर्मावलम्बीकोे महान् पर्व बकर इद (इदु उलल जोहा) आज नेपाललगायत विश्वभरिका मुस्लिम समुदायले धूमधामका साथ मनाइरहेका छन्।
 
बिहानै उठेर नुहाइ धुवाई गरी शुद्ध हुने र खुलास्थान वा मस्जिदमा गई नमाज पढ्नुका साथै अँगालोमा बाँधिएर एकआपसमा शुभकामना आदानप्रदान गर्ने गरिन्छ। नवाज पढेर घर फर्किएपछि खसी, बाख्रा, राँगा र भैंसीको बलि दिने परम्परा छ। 

यो पर्वमा बलि दिएपछि जन्नत  (स्वर्ग)को बाटो खुल्छ भन्ने विश्वास छ । यस पर्वमा स्वस्थ चौपायाको कुर्वानी दिनुपर्छ । इस्लामिक मुलुकमा जति ठूलो चौपायाको कुर्वानी दिने त्यति नै बढी धर्म हुने विश्वास छ। तर नेपालमा खसीबोकाको नै बलि दिइने गरिन्छ।
 
बलि दिएको पशुको मासु तीन भाग लगाइन्छ । एक भाग आफ्ना लागि, अर्को एक भाग नजिकका मित्रलाई र अन्तिम तेस्रो भाग गरिब तथा असहायलाई दिने गरिन्छ।

यस पर्वको अवसरमा विश्वभरिका लाखौं मुस्लिमहरू मक्कामदिना हजका लागि जाने गर्छन्। यस समुदायमा मक्कामदिना हज गर्न जान सक्नुलाई ठूलो धार्मिक सफलता मानिन्छ। 

बकर इदका अवसरमा प्रदेश २ सरकारले सार्वजनिक बिदा दिएको छ। विगतमा केन्द्र सरकारले इदको बिदा दिँदै आए पनि यसपटक कटौती गरेको छ।