पूर्वी नवलपरासी पहिरोमा परी एकै परिवारका तीन बेपत्ता

बुटवल- पूर्वी नवलपरासीको हुप्सेकोट गाउँपालिका वडा नम्बर-४ माथिल्लो चारघरेमा पहिरोमा परी एकै परिवारका तीन जना बेपत्ता भएका छन् भने एक जना गम्भीर घाइते भएका छन्। 

माथिबाट पहिरो खस्दा स्थानीय हस्तबहादुर पुलामीको घर पुरिँदा ५० वर्षीया धनमाया पुलामी र उनका दुई जना नातिनीहरू ७ वर्षीया भूमिसरा र ६ वर्षीया देउमाया बेपत्ता भएको गाउँपालिकाका अध्यक्ष लक्ष्मीदेवी पाण्डेले जानकारी दिइन्। उक्त क्षेत्रमा गए रातिदेखि भारी वर्षा भइरहेको छ। 

घाइते हस्तबहादुरलाई उपचारको लागि सदरमुकाम कावासोती पठाइएको छ। बेपत्ताको खोजी कार्य भइरहेको पाण्डेले जानकारी दिइन्।