पौने दुई करोड ठगेर भागेकी प्रतिमा सिआइबीको फन्दामा  

काठमाडौं - बचतकर्ताको पौने दुई करोड बढि रकम ठगेर फरार रहेकी प्रतिमा गौतमलाई केन्द्रीय अनुसन्धान ब्यूरो (सिआइबी) ले नियन्त्रणमा लिएको छ । 

काठमाडौंको टोखा नगरपालिका–९  स्थित नाङ्गलो दिप सेभिङ्ग एण्ड क्रेडिट को–अपरेटिभ लिमिटेडकी संचालक  प्रतिमा सिटौलाले दुईसय दुई जनाको  एक करोड  ८३ लाख  १८ हजार  ८ सय  ७५ रुपैयाँ लिएर भागेकी थिइन्।  

केन्द्रीय अनुसन्धान ब्यूरोले उनलाइ नुवाकोटको बिदुरबाट सोमबार पक्राउ गरेको हो।

विसं २०७० सालमा आकर्षक ब्याज तथा उपहारसमेत दिने भन्दै सर्वसाधारणको रकम लिएर भागेकी काठमाडौं -२६ नक्सालकी प्रतिमा बिरुद्ध निक्षेपकर्ताले उच्च अदालत पाटनमा मुद्दा हालेका थिए । 

उक्त मुद्दाको फैसला गर्दै उच्च अदालत पाटनले  ०७३ चैत्र ७ गते प्रतिमा बिरुद्ध १ महिना कैद तथा १ करोड ८३ लाख १८ हजार ८ सय ७५ रुपैयाँ जरिवाना हुने फैसला गरेको थियो ।
उच्च अदालतको आदेशपछि फरार रहेकी उनलाई सिआइबीको विशेष टोलीले पक्राउ गरि काठमाडौं जिल्ला अदालतमा बुझाएको छ।
    
काठमाडौं जिल्ला अदालतले उनलाई कैद भुक्तानका लागि केन्द्रीय कारागार कार्यालय सुन्धारा काठमाडौं पठाएको छ।