बैंकका सञ्चालक र सिईओको उमेर हद तोकियो

काठमाडौं- बैंक तथा वित्तीय संस्थाका प्रमुख कार्यकारी अधिकृत (सिईओ) र संचालकको उमेर हद लागु हुने भएको छ। 

नेपाल राष्ट्र बैंकले एक निर्देशिका बनाएर प्रमुख कार्यकारी अधिकृत र संचालकको लागि उमेर हद तोकेको हो। 

उमेर हदअनुसार अब ७० नाघेको व्यक्ति सञ्चालक हुन नपाउने भएका छन्। 

राष्ट्र बैंकले तयार गरेको निर्देशिका कार्यान्वयनमा आएपछि सञ्चालकका रुपमा रहेका व्यक्ति ७४ वर्ष पुगेको भए तत्कालै राजीनामा दिनुपर्ने छ भने नयाँ नियुक्त गर्दा ७० वर्षे उमेर हदको दायरामा रहने गरी नियुक्त गर्नुपर्नेछ।

यस्तै बैंक तथा वित्तीय संस्थाको प्रमुख कार्यकारी अधिकृतका लागि ६५ वर्षको उमेर हद तोकिएको छ।

निर्देशिका लागु हुनुअघि नियुक्त भएका प्रमुख कार्यकारी अधिकृत पनि ६९ वर्ष उमेर पुगेको भए पद छाड्नुपर्ने भएको छ। नयाँ नियुक्त गर्दा कार्यकालभरि ६५ वर्ष उमेर रहने गरी नियुक्त गर्नुपर्ने भएको छ।

यो व्यवस्था लागू भएपछि अहिले सञ्चालक तथा प्रमुख कार्यकारी अधिकृत रहेका कतिपय व्यक्तिले पद तत्काल छोड्नुपर्ने देखिएको छ।