तस्करीको यस्तो काइदा : हेल्मेटभित्र चाँदी

जनकपुरधाम – सशस्त्र प्रहरीले तस्करी गर्न लागिएको चाँदीसहित एकजनालाई नियन्त्रणमा लिएको छ। १५ किलो चाँदीको दानासहित भारत प्रवेश गर्न लागेको अवस्थामा सशस्त्र प्रहरीले धनुषाको मुखियापट्टी मुसहरनिया गाउँपालिका–२ का ३२ वर्षीय वीरेन्द्र महतोलाई पक्राउ गरेको छ।

महोत्तरीको मठिहानीस्थित सशस्त्र प्रहरी बोर्डर आउटपोस्टबाट गस्तीमा खटिएको टोलीले महतोलाई दशगजा नजिकबाट सोमबार नियन्त्रणमा लिएको हो ।

आउटपोस्टका सशस्त्र प्रहरी निरीक्षक शुभाषचन्द्र मैनालीका अनुसार बीआर ३२ एल ०९८९ भारतीय नम्बरको मोटरसाइल चढेर भारततर्फ गइरहेका महतोको हेल्मेटभित्र चाँदीको पोका बरामद भएको हो। 

महतो चाँदीको दाना बनाइ हेल्मेटभित्र राखेर भारततर्फ गइरहेको अवस्थामा पक्राउ परेको उनले बताए। बरामद गरिएको चाँदीको बजार मूल्य १० लाखभन्दा बढी रहेको बताइएको छ।

महतोले चाँदी भारतको दरभंगासम्म पुर्याउने जिम्मा लिएको प्रहरीसमक्ष बयान दिएका छन् । दरभंगाको कपिल नामक सुनचाँदी कारोबारीका साथै त्यहाँका ठुला पसलहरुमा चाँदी पुर्याउने गरेको महतोले प्रहरीलाई बताएको छ । यसअघिपनि दुईपटक गरी २५ किलो चाँदी भारत छिराएको उनले प्रहरीसमक्ष स्वीकारेका छन् ।

निरीक्षक मैनालीले जनाएअनुसार महतोको साथबाट नेपालको एनसीसी बैंक र भारतको पञ्जाब नेशनल बैंकको एटीएम, भारतीय पहिचानपत्र र भारतीय लाइसेन्स बरामद भएको छ।