सिंगापुर उड्दै प्रधानमन्त्री ओली

काठमाडौं - प्रधानमन्त्री केपी शर्मा ओली नियमित स्वास्थ्य परीक्षणका लागि आज सिंगापुर जाने भएका छन्। सिंगापुरस्थित ‘नेसनल युनिभर्सिटी हस्पिटल’ (एनयूएच) मा स्वास्थ्य परीक्षण गर्न ओली आज बेलुका पौने १० बजे  सिल्क एयरबाट त्यसतर्फ जान लागेका हुन्।

उनी निजी चिकित्सक प्रा.डा.दिव्यासिंह शाह, श्रीमती राधिका शाक्य, स्वकीय सचिवसहित करिब एक साताका लागि सिंगापुर जान लागेका हुन्। चिकित्सकको सुझावअनुसार उनी थप फलोअपका लागि सिंगापुर जान लागेका हुन्।

प्रधानमन्त्री ओलीको सन् २००७ मा दिल्लीस्थित इन्द्रप्रस्थ अपोलो अस्पतालमा मिर्गौला प्रत्यारोपण गरिएको थियो। ६ वर्षअघि उनको हातमा संक्रमण भएको थियो। लामो समय उपचार गरेर निको भएको थियो। उनले दिल्ली र थाइल्यान्डमा गएर उपचार गरेका थिए। त्यसपछि नियमित फलोअपका लागि थाइल्यान्ड र सिंगापुर जाने गरेका छन्।

गत १० साउनमा सैनिक अस्पताल छाउनीमा उनको स्वास्थ्य परीक्षण गरिएको थियो। परीक्षणका क्रममा यूएसजी ग्याइडेड ‘रेनल बायोप्सी’ मा उनको रगतमा क्रिएटिनिनको मात्रा बढेको देखिएपछि चिकित्सकले उनलाई सिंगापुर जान सुझाव दिएका थिए।