बालाजुमा मेलम्चीको पाइपमा फसेका २ जनाको मृत्यु 

काठमाडौं- मेलम्ची खानेपानीको पाइप सफा गर्ने क्रममा काठमाडौंको बालाजुमा २ जनाको मृत्यु भएको छ ।
 
महानगरीय प्रहरी वृत्त बालाजुका डीएसपी बालनरसिंह राणाका अनुसार मृत्यु हुनेमा सप्तरीका २५ वर्षीय शिवकान्त साह, सुरेन्द्र साह रहेका छन् ।

बिहान ०९ः५० बजे काठमाडौँ महानगरपालिका–१६, बालाजु चोकस्थित मेलम्ची खानेपानी आयोजनाको ठूलो पाइपभित्र प्रवेश गरी सफा गर्ने क्रममा अक्सिजनको कमी भएर मृत्यु भएको डिएसी राणाले बताए ।
 
उनीहरुको चिन्ताजन अवस्थामा प्रहरीले उद्धार गरेको थियो । आधा घन्टा लामो प्रयासपछि उद्धार गर्दा चिन्ताजनक अवस्थामा भेटिएका दुवैलाई उपचारका लागि त्रिवि शिक्षण अस्पताल महाराजगञ्जमा पठाइएको थियो । उनीहरुलाई अस्पताल पुर्याउनासाथ डाक्टरले मृत घोषित गरेको थियो ।
 
शुक्रबार बिहानै मेलम्चीको पाइप सफा गर्न सडकमा रहेको म्यानहोलबाट छिरेका उनीहरू त्यहीँ अड्किएका थिए। लामो समयसम्म बाहिर ननिस्किएपछि प्रहरीले डोजर लगाएर खनेर दुवैलाइ निकालेको थियो।