बाजुरामा पहिरोले घर पुर्दा आमा छोरीको मृत्यु, पाँच घाइते

बाजुरा- अविरल वर्षासँगै आएको पहिरोमा परेर बाजुरामा आमा छोरीको मृत्यु भएको छ । अन्य पाँच जना घाइते भएका छन् ।

गौमुल गाउँपालिका–६ बसालाको शान्तिटोलमा बिहीबार राति करीब १ बजेतिर घरमाथिबाट पहिरो खसेर पुर्दा उनीहरुको मृत्यु भएको हो । 

मृत्यु हुनेमा ३० वर्षीया आमा निरुता चदारा र छ वर्षीया छोरी किस्मिता चदाराको रहेको जिल्ला प्रहरी कार्यालय बाजुराका प्रहरी नायब उपरीक्षक उद्धवसिंह भाटले जानकारी दिए।

पहिरोमा परी पाँचजना घाइते भएका छन्। घाइते हुनेमा ९० वर्षीय जङ्गे चदारा, जडेनी चदारा, सुके चदारालगायत छन्। जङ्गे चदाराको गौमुल गाउँपालिकाको घटमुना शहरी स्वास्थ्य केन्द्रमा उपचार भइरहेको छ।

वर्षा नरोकिएका कारण गाउँमा थप त्रास फैलिएको वडा सदस्य प्रेम विकले बताए। थप उद्धारका लागि जिल्ला प्रहरी कार्यालय बाजुराको टोली र घटमुना प्रहरी चौकीबाट प्रहरीको टोली त्यसतर्फ गइसकेको छ।

जिल्लाका धेरै बस्ती भिरालो ठाउँमा भएका कारण पहिरोको उच्च जोखिममा छन्।