समाजवादी पार्टीका नेतामाथि गोली प्रहार

काठमाडौं - समाजवादी पार्टीका नेतामाथि कपिलवस्तुको शुद्धोधन गाउँपालिकामा गोली प्रहार भएको छ। पार्टीका स्थानीय नेता रामनयन यादवमाथि अज्ञात समूहले गोली प्रहार गरेको हो।

बिहीबार दिउँसो अज्ञात समूहले गोली प्रहार गरेको र उनीहरुको पहिचान भइनसकेको प्रहरीले जानकारी दिएको छ। नेता यादवको पाखुरामा गोली लागेको छ। उनको अवस्था भने सामान्य रहेको र तौलिहवास्थित जिल्ला अस्पतालमा उपचार भइरहेको छ ।

यता जिल्ला प्रहरी कार्यालय कपिलवस्तुका प्रहरी प्रमुख विग शमशेर राणाले घाइते यादवले तीन जनाविरुद्ध किटानी जाहेरी दिएको बताए। यादवले जाहेरी दिएकामा शुद्धोधन गाउँपालिका- ५ शिवलवा बस्ने लाला भन्ने हुमनाथ चौधरी, सोही गाउँपालिका वडा नं. ४ बिठुवा बस्ने अनिल चौधरी र सोही गाउँपालिका वडा नं. ५ दोहनी बस्ने लौकुस चौधरी रहेका छन्। उनीहरु नेकपाका कार्यकर्ता रहेका राणाले बताए। यादव तत्कालीन माओवादीविरुद्धको प्रतिकार समितिका संयोजक रहेका र उनीहरुबीच पहिले देखि नै विवाद रहेको उनले बताए।

घटनाबारे थप अनुसन्धान भैरहेको प्रहरीले जनाएको छ।