कसले हान्यो वडा कार्यालयमा पेट्रोल बम ?

नुवाकोट- अज्ञात समूहले नुवाकोटको ककनी गाउँपालिका वडा नम्बर–१ को कार्यालयमा पेट्रोल बम प्रहार गरेको छ ।

मंगलबार राती ११ बजेर ३५ मिनेटको समयमा अज्ञात समूहले पेट्रोल बम प्रहार गर्दा वडा भवनको दुई कोठामा क्षती पुगेको छ ।

वडा अध्यक्ष र सचिवको कोठामा रहेको कागजपत्र, फर्निचर, कम्युटर लगायतको सामाग्री जलेको जिल्ला प्रहरी कार्यालय नुवाकोटले जनाएको छ ।
  
बम प्रहारसँगै भएको आगलागी राती १ बजे मात्रै नियन्त्रणमा आएको थियो । बम प्रहार गर्ने अज्ञात समूह फरार रहेकोले खोजी कार्य भइरहेको जिल्ला प्रहरी कार्यालय नुवाकोटले जनाएको छ ।

स्थानीय तहको निर्वाचन पछि प्रयोग विहिन अवस्थामा रहेको युवा क्लवको भवन वडाले मर्मत सम्भार गरी वडा कार्यालयले प्रयोग गर्दै आएको थियो ।

भवनमा रहेको ४ कोठा मध्ये २ कोठामा क्षती पुगेको वडा अध्यक्ष चन्द्रबहादुर बलामीले बताए ।

आगलागीको बिषयमा नेकपा बिप्लब नेतृत्व माओबादीले जिम्मेवारी लिएको नुवाकोट सेक्रेटरी बिन्तोस शिलवालले बताए ।